നഴ്‌സുമാരുടെ പണിമുടക്ക് നാളെ; ആവശ്യങ്ങൾ അംഗീകരിച്ചില്ലെങ്കിൽ സമരം ശക്തമാക്കാൻ യു.എൻ.എ.

തിരുവനന്തപുരം: വിവിധ ആവശ്യങ്ങൾ ഉന്നയിച്ച് സംസ്ഥാനത്തെ സ്വകാര്യ ആശുപത്രി ജീവനക്കാർ ശനിയാഴ്ച സൂചനാ പണിമുടക്ക് നടത്തുന്നു. യുണൈറ്റഡ് നഴ്‌സസ് അസോസിയേഷന്റെ (യു.എൻ.എ.) നേതൃത്വത്തിലാണ് സമരം സംഘടിപ്പിക്കുന്നത്. ഇതിന്റെ ഭാഗമായി തൃശ്ശൂരിൽ വിപുലമായ 'അവകാശ പ്രഖ്യാപന സമ്മേളനവും' നടക്കും. 

'അതിജീവനത്തിനായുള്ള പോരാട്ടം' എന്ന മുദ്രാവാക്യമുയർത്തി നടത്തുന്ന സമരത്തിൽ ജീവനക്കാർ മുന്നോട്ടുവെക്കുന്ന പ്രധാന ആവശ്യങ്ങൾ ഇവയാണ്. നഴ്‌സുമാരുടെ അടിസ്ഥാന ശമ്പളം 40,000 രൂപയാക്കി ഉയർത്തുക. തുല്യജോലിക്ക് തുല്യവേതനം ഉറപ്പാക്കുക, ആശുപത്രി ജീവനക്കാർക്ക് യു.ജി.സി. സ്‌കെയിൽ ശമ്പളം നടപ്പിലാക്കുക. ഡോ. ബൽറാം കമ്മിറ്റി, ജഗദീഷ് പ്രസാദ് കമ്മിറ്റി, വീരകുമാർ കമ്മിറ്റി എന്നിവരുടെ ശുപാർശകൾ നടപ്പിലാക്കുക. 

എൻ.എച്ച്.എം., പാലിയേറ്റീവ് കെയർ, എം.എൽ.എസ്.പി., എച്ച്.ഡി.എസ്., ഇ.എം.ടി. ജീവനക്കാർക്കും അർഹമായ വേതന വർദ്ധനവ് ഉറപ്പാക്കുക. എല്ലാ വിഭാഗം ആരോഗ്യ പ്രവർത്തകരും പണിമുടക്കിൽ അണിചേരണമെന്ന് യു.എൻ.എ. ഭാരവാഹികൾ അഭ്യർത്ഥിച്ചു. തൃശ്ശൂരിൽ നടക്കുന്ന സമ്മേളനത്തിന് ശേഷം ഭാവി സമരപരിപാടികൾ പ്രഖ്യാപിക്കും. ഈ സൂചനാ പണിമുടക്ക് സ്വകാര്യ ആശുപത്രികളുടെ പ്രവർത്തനത്തെ ബാധിച്ചേക്കാൻ സാധ്യതയുണ്ട്.