ഇന്ത്യയ്ക്ക് കനത്ത തിരിച്ചടി; ആഗോള ഓഹരി വിപണിയിൽ അഞ്ചാം സ്ഥാനം പിടിച്ചെടുത്ത് തായ്‌വാൻ

    ആഗോള സാമ്പത്തിക ക്രമത്തിൽ വലിയ ചലനങ്ങൾ സൃഷ്ടിച്ചുകൊണ്ട് ഇന്ത്യയെ പിന്തള്ളി തായ്‌വാൻ ലോകത്തിലെ അഞ്ചാമത്തെ വലിയ ഓഹരി വിപണിയായി മാറി. ബ്ലൂംബെർഗ് പുറത്തുവിട്ട ഏറ്റവും പുതിയ കണക്കുകൾ പ്രകാരം തായ്‌വാന്റെ ആകെ വിപണി മൂല്യം 4.95 ട്രില്യൺ ഡോളറിലേക്ക് കുതിച്ചുയർന്നപ്പോൾ, ഇന്ത്യൻ വിപണിയുടെ മൂല്യം 4.92 ട്രില്യൺ ഡോളറായി (ഏകദേശം 410 ലക്ഷം കോടി രൂപ) ചുരുങ്ങി. ആഗോളതലത്തിൽ ആർട്ടിഫിഷ്യൽ ഇന്റലിജൻസ് (AI) മേഖലയിലുണ്ടായ അഭൂതപൂർവ്വമായ വളർച്ചയാണ് തായ്‌വാന് ഈ ചരിത്ര നേട്ടം സമ്മാനിച്ചത്. തായ്‌വാനിലെ പ്രമുഖ ചിപ്പ് നിർമ്മാണ ഭീമനായ തായ്‌വാൻ സെമികണ്ടക്ടർ മാനുഫാക്ചറിംഗ് കമ്പനിയുടെ (TSMC) അസാധാരണ കുതിപ്പാണ് ഇതിന് പിന്നിലെ പ്രധാന ചാലകശക്തി.

   നിർമ്മിത ബുദ്ധി സാങ്കേതികവിദ്യകൾക്കായി ഉപയോഗിക്കുന്ന അത്യാധുനിക ചിപ്പുകളുടെ ആഗോള ആവശ്യകത വർദ്ധിച്ചതോടെ ടിഎസ്എംസിയുടെ ഓഹരികളിൽ ഈ വർഷം മാത്രം 49 ശതമാനത്തിന്റെ വൻ വളർച്ചയാണുണ്ടായത്. തായ്‌വാൻ ഓഹരി സൂചികയുടെ 42 ശതമാനവും ഈ ഒരൊറ്റ കമ്പനിയുടെ പക്കലാണെന്നത് ഇതിന്റെ സ്വാധീനം വ്യക്തമാക്കുന്നു. ആഗോള നിക്ഷേപകർ എഐ അധിഷ്ഠിത ടെക്നോളജി വിപണികളിലേക്ക് വൻതോതിൽ പണമൊഴുക്കിയപ്പോൾ അതിന്റെ പ്രധാന ഗുണഭോക്താക്കളായി തായ്‌വാനും ദക്ഷിണ കൊറിയയും മാറുകയായിരുന്നു. അതേസമയം, വലിയ കയറ്റിറക്കങ്ങളിലൂടെ കടന്നുപോകുന്ന ഇന്ത്യൻ ഓഹരി വിപണിക്ക് തായ്‌വാന്റെ ഈ കുതിപ്പ് കനത്ത വെല്ലുവിളിയാണ് ഉയർത്തുന്നത്.