ഇറാന്‍-യുഎസ് കരാര്‍ തകര്‍ത്തത് നെതന്യാഹുവിന്റെ ആ ഫോണ്‍ വിളി? വാന്‍സുമായുള്ള സംഭാഷണത്തില്‍ പുകഞ്ഞ് ഇറാന്‍!

ഇറാൻ-അമേരിക്ക ചർച്ചകൾ പരാജയപ്പെട്ടതിന് പിന്നിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവാണെന്ന ആരോപണവുമായി ഇറാൻ രംഗത്തെത്തിയിരിക്കുന്നു. ഇസ്ലാമാബാദിൽ നടന്ന നിർണ്ണായക ചർച്ചകൾക്കിടയിൽ നെതന്യാഹു അമേരിക്കൻ വൈസ് പ്രസിഡന്റ് ജെ.ഡി. വാൻസുമായി നടത്തിയ ഫോൺ വിളിയാണ് കരാറിലേക്കുള്ള പാത തടസ്സപ്പെടുത്തിയതെന്നാണ് ഇറാന്റെ വാദം. ആണവായുധം, മരവിപ്പിച്ച ആസ്തികൾ, ഹോർമുസ് കടലിടുക്കിലെ സുരക്ഷ തുടങ്ങിയ വിഷയങ്ങളിൽ ധാരണയിലെത്താൻ തൊട്ടടുത്തെത്തിയപ്പോഴാണ് ഇസ്രായേലിന്റെ ഇടപെടലുണ്ടായതെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി ആരോപിച്ചു.

കരാർ പൂർത്തിയാക്കാൻ ഇഞ്ചുകൾ മാത്രം ബാക്കിയുള്ളപ്പോഴാണ് 'പുറത്തുനിന്നുള്ള കക്ഷി' ഗോൾ പോസ്റ്റുകൾ മാറ്റിയതെന്ന് അരാഗ്ചി എക്സിൽ കുറിച്ചു. യുദ്ധക്കളത്തിൽ നേടാൻ കഴിയാത്ത കാര്യങ്ങൾ ചർച്ചാ മേശയിലൂടെ നേടിയെടുക്കാൻ അമേരിക്ക ശ്രമിച്ചതായും ഇറാൻ കുറ്റപ്പെടുത്തി. എന്നാൽ, 21 മണിക്കൂർ നീണ്ട ചർച്ചകൾ വിജയിച്ചില്ലെങ്കിലും ടെഹ്‌റാനിലെ പുതിയ നേതൃത്വവുമായി മെച്ചപ്പെട്ട ബന്ധമുണ്ടാക്കാൻ ഇത് സഹായിച്ചതായാണ് വാഷിങ്ടൺ പോസ്റ്റ് റിപ്പോർട്ട് ചെയ്യുന്നത്. നിലവിൽ ഇറാന്റെ ആണവ പ്രവർത്തനങ്ങളിലും ഹോർമുസ് ഉപരോധത്തിലും വ്യക്തമായ ധാരണയിലെത്താൻ സാധിക്കാത്തതാണ് പ്രധാന വെല്ലുവിളിയായി തുടരുന്നത്.