കേരളത്തിൽ പി.എസ്.സി പ്രായപരിധി 40 വയസ്സായി ഉയർത്തി; മന്ത്രിസഭാ യോഗത്തിൽ നിർണായക തീരുമാനങ്ങൾ

തിരുവനന്തപുരം: കേരളത്തിലെ സർക്കാർ ജോലിക്കായി പി.എസ്.സി വഴി അപേക്ഷിക്കാനുള്ള ഉയർന്ന പ്രായപരിധി 40 വയസ്സായി വർദ്ധിപ്പിക്കാൻ മന്ത്രിസഭാ യോഗം തീരുമാനിച്ചു. നിലവിലിത് 36 വയസ്സായിരുന്നു. ജെ.ബി. കോശി കമ്മീഷൻ റിപ്പോർട്ട് തത്വത്തിൽ അംഗീകരിച്ചതിനെത്തുടർന്നാണ് ഈ സുപ്രധാന നീക്കം.

ജനറൽ വിഭാഗത്തിന് 36-ൽ നിന്ന് 40 വയസ്സായി ഉയർത്തി. എസ്‌സി/എസ്ടി വിഭാഗത്തിന് നിലവിലെ 41-ൽ നിന്ന് 45 വയസ്സായി ഉയർത്തി. ഒ.ബി.സി വിഭാഗത്തിന് ഒ.ബി.സി വിഭാഗങ്ങൾക്കും നിലവിലെ പ്രായപരിധിയിൽ (39 വയസ്സ്) നിന്ന് ആനുപാതികമായ വർദ്ധനവുണ്ടാകും.

ലത്തീൻ കത്തോലിക്ക സമുദായ സർട്ടിഫിക്കറ്റ്: ജാതി സർട്ടിഫിക്കറ്റിനായി 1947 എന്ന വർഷം മാനദണ്ഡമാക്കേണ്ടതില്ലെന്ന് തീരുമാനിച്ചു. ബിഷപ്പ് നൽകുന്ന രേഖ ഇതിനായി പരിഗണിക്കും. പ്രകൃതിദുരന്തങ്ങൾ മൂലമുള്ള നഷ്ടങ്ങൾക്ക് സാമ്പത്തിക സുരക്ഷ ഉറപ്പാക്കാൻ വീടുകൾക്കായി 'സമഗ്ര ഗ്രൂപ്പ് ഇൻഷുറൻസ്' പദ്ധതി നടപ്പിലാക്കും.

ഭാവിയിൽ സർക്കാർ ഉടമസ്ഥതയിലുള്ള വിദ്യാഭ്യാസ സ്ഥാപനങ്ങൾക്ക് മതാധിഷ്ഠിതമായ പേരുകൾ നൽകരുതെന്ന് മന്ത്രിസഭ നിർദ്ദേശിച്ചു. ജെ.ബി. കോശി കമ്മീഷന്റെ 32 ശുപാർശകൾ കൂടി യോഗം അംഗീകരിച്ചു. സംസ്ഥാനത്തെ ലക്ഷക്കണക്കിന് ഉദ്യോഗാർത്ഥികൾക്കും വിവിധ സാമൂഹിക വിഭാഗങ്ങൾക്കും വലിയ ആശ്വാസം നൽകുന്നതാണ് സർക്കാരിന്റെ ഈ പുതിയ തീരുമാനങ്ങൾ.