തൃശൂരിൽ ശസ്ത്രക്രിയ കഴിഞ്ഞ പെൺകുട്ടിക്ക് വോട്ട് നിഷേധിക്കാൻ നീക്കം; വിരലിൽ പരിക്കേറ്റതിനാൽ മഷി പുരട്ടാനാവില്ലെന്ന് ഉദ്യോഗസ്ഥർ; ഒടുവിൽ സിഇഒയുടെ ഇടപെടൽ

തൃശൂർ: തൃശൂർ മണ്ഡലത്തിലെ കൂർക്കഞ്ചേരിയിൽ കൈക്ക് ശസ്ത്രക്രിയ കഴിഞ്ഞ പെൺകുട്ടിക്ക് വോട്ട് നിഷേധിക്കാൻ പോളിംഗ് ഉദ്യോഗസ്ഥർ നടത്തിയ നീക്കം പ്രതിഷേധത്തിന് ഇടയാക്കി. പരിക്കേറ്റ വിരലിൽ മഷി പുരട്ടാൻ കഴിയില്ലെന്ന വിചിത്ര വാദം ഉന്നയിച്ചാണ് അക്ഷര എന്ന വോട്ടറെ ഉദ്യോഗസ്ഥർ തടഞ്ഞത്. ഒടുവിൽ മുഖ്യ തിരഞ്ഞെടുപ്പ് ഓഫീസറുടെ ഇടപെടലോടെ വൈകിട്ടോടെ പെൺകുട്ടി വോട്ട് രേഖപ്പെടുത്തി.

മിക്സിയിൽ കുരുങ്ങി ചൂണ്ടുവിരലിന് പരിക്കേറ്റതിനാലാണ് അക്ഷരയ്ക്ക് ശസ്ത്രക്രിയ വേണ്ടിവന്നത്. ഉച്ചയ്ക്ക് ഒരു മണിയോടെ വോട്ട് ചെയ്യാനെത്തിയെങ്കിലും വിരലിലെ മുറിവ് കാരണം മഷി പുരട്ടാൻ കഴിയില്ലെന്ന് പറഞ്ഞ് ഉദ്യോഗസ്ഥർ വോട്ട് തടയുകയായിരുന്നു. മണിക്കൂറുകളോളം കാത്തുനിന്നിട്ടും അധികൃതർ നിലപാട് മാറ്റാത്തതോടെ രാഷ്ട്രീയ നേതാക്കൾ ബൂത്തിലെത്തി പ്രതിഷേധിച്ചു.

വോട്ട് നിഷേധിച്ച വിവരം അറിഞ്ഞ് എൽഡിഎഫ് സ്ഥാനാർത്ഥി വി.എസ്. സുനിൽകുമാർ ഉൾപ്പെടെയുള്ള നേതാക്കൾ സ്ഥലത്തെത്തുകയും ഉദ്യോഗസ്ഥരുടെ നടപടിയെ ചോദ്യം ചെയ്യുകയും ചെയ്തു. സംഭവം വിവാദമായതോടെ മുഖ്യ തിരഞ്ഞെടുപ്പ് ഓഫീസർ (CEO) ഇടപെട്ടു. അക്ഷര നേരത്തെ വോട്ട് ചെയ്തിട്ടില്ലെന്ന് ഉറപ്പുവരുത്തിയ ശേഷം ഏത് വിരലിലായാലും മഷി പുരട്ടി വോട്ട് ചെയ്യാൻ അനുവദിക്കാമെന്ന് അദ്ദേഹം വ്യക്തമാക്കിയതോടെയാണ് പ്രതിസന്ധി ഒഴിഞ്ഞത്.

ഒടുവിൽ വൈകിട്ട് ആറ് മണിയോടെ അക്ഷര തന്റെ സമ്മതിദാനാവകാശം വിനിയോഗിച്ചു. തിരഞ്ഞെടുപ്പ് ചട്ടങ്ങൾ പ്രകാരം ഒരു വിരലിൽ പരിക്കുണ്ടെങ്കിൽ മറ്റ് വിരലുകളിലോ രണ്ടാമത്തെ കൈയിലോ മഷി പുരട്ടി വോട്ട് ചെയ്യാൻ അനുവാദമുണ്ട്. ഈ നിയമം നിലനിൽക്കെ പെൺകുട്ടിയെ മണിക്കൂറുകളോളം ബൂത്തിൽ കാത്തുനിർത്തിയത് ഉദ്യോഗസ്ഥരുടെ ഭാഗത്തുനിന്നുണ്ടായ ഗുരുതര വീഴ്ചയാണെന്ന് നേതാക്കൾ ആരോപിച്ചു.