വെള്ളിയുടെ ഇറക്കുമതിക്ക് കേന്ദ്രസർക്കാർ നിയന്ത്രണം ഏർപ്പെടുത്തി

വില കുതിച്ചുയരുന്നതിനിടെ, വെള്ളിയുടെ ഇറക്കുമതിക്ക് കേന്ദ്രസർക്കാർ നിയന്ത്രണം ഏർപ്പെടുത്തി. ചില ആസിയാൻ രാജ്യങ്ങളിൽ നിന്ന് വെള്ളി ആഭരണങ്ങൾ അടക്കമുള്ളവ രാജ്യത്തേക്ക് വൻതോതിൽ ഇറക്കുമതി ചെയ്തിരുന്നത് ശ്രദ്ധയിൽപ്പെട്ടതിനെ തുടർന്നാണ് ഈ താൽക്കാലിക നിയന്ത്രണം. ഇറക്കുമതി ദുരുപയോഗം തടയാൻ: സ്വതന്ത്ര വ്യാപാര കരാറുകൾ ദുരുപയോഗം ചെയ്യുന്നത് തടയുന്നതിനും 'ഫിനിഷ്ഡ് ആഭരണങ്ങൾ' എന്ന മറവിൽ വൻതോതിലുള്ള വെള്ളി ഇറക്കുമതി നിയന്ത്രിക്കുന്നതിനുമാണ് ഈ നടപടി.

ഇനി നിയന്ത്രിത വിഭാഗത്തിലുള്ള ഉൽപ്പന്നങ്ങൾ രാജ്യത്തേക്ക് കൊണ്ടുവരുന്നതിന് സർക്കാരിൽ നിന്ന് ലൈസൻസ് നിർബന്ധമാണ്. കഴിഞ്ഞ വർഷം ഏപ്രിൽ-ജൂൺ മുതൽ 2025-26 ഏപ്രിൽ-ജൂൺ വരെ നികുതിയിളവുള്ള വെള്ളി ആഭരണങ്ങളുടെ ഇറക്കുമതി കുത്തനെ വർധിച്ചിരുന്നു. ഈ വർഷത്തിന്റെ ആദ്യ പകുതിയിൽ വെള്ളി വിലയിൽ വലിയ വർദ്ധനവ് രേഖപ്പെടുത്തി. 

ജനുവരി 1: ഒരു കിലോ വെള്ളിയുടെ വില 87,578 രൂപ ആയിരുന്നു. ജൂൺ 30: വില 1.05 ലക്ഷം രൂപയായി ഉയർന്നു. ആറ് മാസം കൊണ്ട് 20.4 ശതമാനം വളർച്ചയാണ് വെള്ളിവിലയിൽ ഉണ്ടായത്. നിയന്ത്രണം അടുത്ത വർഷം മാർച്ച് 31 വരെ തുടരും.