ലെബനനിൽ ആക്രമണം തുടരുന്ന ഇസ്രയേൽ; യുഎസുമായുള്ള ചർച്ചകൾ നിർത്തിവെച്ച് ഇറാൻ

തെഹ്റാൻ: ലെബനനിൽ ഇസ്രയേൽ നടത്തുന്ന ആക്രമണങ്ങൾ തുടരുന്ന സാഹചര്യത്തിൽ അമേരിക്കയുമായുള്ള എല്ലാ സമാധാന ചർച്ചകളും താത്കാലികമായി നിർത്തിവെച്ചതായി ഇറാൻ പ്രഖ്യാപിച്ചു. ലെബനനിൽ വെടിനിർത്തൽ പൂർണമായും നടപ്പിലാകുകയും ഇസ്രയേൽ ആക്രമണങ്ങൾ അവസാനിക്കുകയും ചെയ്യുന്നതുവരെ ചർച്ചകൾ പുനരാരംഭിക്കില്ലെന്നാണ് ഇറാന്റെ നിലപാട്.

ഇറാൻ വിദേശകാര്യ മന്ത്രി അബ്ബാസ് അരാഗ്ചിയാണ് സമൂഹമാധ്യമത്തിലൂടെ ഇക്കാര്യം അറിയിച്ചത്. ഇറാനും അമേരിക്കയും തമ്മിലുള്ള ധാരണകൾ ലെബനൻ ഉൾപ്പെടെയുള്ള മേഖലകളിലും ബാധകമാണെന്നും, വെടിനിർത്തൽ ലംഘനങ്ങൾക്ക് ഇസ്രയേലിനൊപ്പം അമേരിക്കയും ഉത്തരവാദിത്തം ഏറ്റെടുക്കേണ്ടിവരുമെന്നും അദ്ദേഹം വ്യക്തമാക്കി.

ലെബനനിൽ ഇസ്രയേൽ തുടരുന്ന സൈനിക നടപടികൾ മേഖലയിലെ സമാധാന ശ്രമങ്ങൾക്ക് തിരിച്ചടിയാണെന്ന് ഇറാൻ ആരോപിച്ചു. നിലവിലെ സാഹചര്യത്തിൽ മധ്യസ്ഥതയിലൂടെ നടക്കുന്ന എല്ലാ നയതന്ത്ര ചർച്ചകളും നിർത്തിവെക്കുകയാണെന്നും ഇറാൻ ഔദ്യോഗികമായി അറിയിച്ചു.

ഇസ്രയേൽ ആക്രമണങ്ങളുടെ പ്രത്യാഘാതങ്ങളെക്കുറിച്ച് ഇറാൻ വിദേശകാര്യ മന്ത്രി അബ്ബാസ് അരാഗ്ചിയും പാർലമെന്റ് സ്പീക്കർ മുഹമ്മദ് ബാഗർ ഗാലിബാഫും നേരത്തെ മുന്നറിയിപ്പ് നൽകിയിരുന്നു. അതിന് പിന്നാലെയാണ് അമേരിക്കയുമായുള്ള ചർച്ചകൾ നിർത്തിവെക്കുന്ന കാര്യം ഔദ്യോഗികമായി പ്രഖ്യാപിച്ചത്.