അല്‍ഷിമേഴ്സ് കണ്ടെത്താം, ലളിതമായ രക്തപരിശോധനയിലൂടെ...

ലോകമെമ്പാടും ദശലക്ഷക്കണക്കിന് ആളുകളെ ബാധിക്കുന്ന നാഡീവ്യവസ്ഥാ രോഗമാണ് അല്‍ഷിമേഴ്‌സ്. ഇത് സാധാരണയായി 65 വയസിന് മുകളില്‍ പ്രായമുള്ളവരിലാണ് കാണപ്പെടാറുള്ളതെങ്കിലും ചിലപ്പോള്‍ പ്രായം കുറഞ്ഞവര്‍ക്കും ഈ രോഗം ബാധിക്കാം. തലച്ചോറിൽ ചില ടോക്സിക് പ്രോട്ടീനുകൾ അടിഞ്ഞു കൂടുന്നതാണ് പ്രധാനമായും അൽഷിമേഴ്സിലേക്ക് നയ്ക്കുന്ന പ്രധാന കാരണം.

സാധാരണയായി പെറ്റ് സ്കാനിങ്ങിലൂടെയും സ്പൈനൽ ടാപ്പ് പരിശോധനയിലൂടെയുമൊക്കെയാണ് അൽഷിമേഴ്സ് രോ​ഗനിർണയം നടത്തിയിരുന്നത്. ഇത് രണ്ടും സമയം എടുക്കുന്നതും ചെലവേറിയതുമാണ്. എന്നാൽ, അത്രയൊന്നും പോകാതെ ലളിതമായ ഒരു രക്തപരിശോധനയിലൂടെ അൽഷിമേഴ്സ് രോ​ഗനിർണയം നടത്താൻ കഴിയുമെന്ന് ​ഗവേഷകർ വ്യക്തമാക്കുന്നു.

'ലുമിപൾസ് ജി pTau217/β-അമിലോയിഡ് 1-42 പ്ലാസ്മ' എന്ന രക്ത പരിശോധനയിലൂടെ തലച്ചോറിലെ ഫോസ്ഫോറിലേറ്റഡ് ടൗ 217 (p-Tau217), ബീറ്റാ-അമിലോയിഡ് 1-42 എന്നീ രണ്ട് പ്രോട്ടീനുകളുടെ അളവ് വിശകലനം ചെയ്യുന്നതിലൂടെ അൽഷിമേഴ്സ് രോ​ഗം തിരിച്ചറിയാനാകുമെന്ന് ​ഗവേഷകർ പറയുന്നു. പരിശോധനയ്ക്ക് എഫ്ഡിഎ അം​ഗീകാരവും ലഭിച്ചിട്ടുണ്ട്. പരിശോധനഫലങ്ങൾ 92 ശതമാനത്തോളം കൃത്യമായിരുന്നുവെന്നും പഠനത്തിലൂടെ തെളിയിക്കപ്പെട്ടുവെന്നും ​ഗവേഷകർ പറയുന്നു.