മൂന്ന് മാസം കൂടുമ്പോള്‍ ടൂത്ത് ബ്രഷ് മാറ്റണം

ആരോഗ്യമുള്ള പല്ലുകൾ ശരീരത്തിന്‍റെ മൊത്തത്തിലുള്ള ആരോഗ്യത്തിൻ്റെ അടയാളമാണെന്ന് ആരോഗ്യവിദഗ്ധർ. അതിനാൽ, ടൂത്ത് ബ്രഷ് തെരഞ്ഞെടുക്കുന്നതിലും ഉപയോഗിക്കുന്നതിലും കൃത്യമായ ശ്രദ്ധ നൽകേണ്ടത് അത്യാവശ്യമാണ്.

ദന്ത ഡോക്ടർമാർ പ്രധാനമായും നൽകുന്ന നിർദേശങ്ങൾ ഇവയാണ്: ഓരോ മൂന്ന് മാസം കൂടുമ്പോഴും ടൂത്ത് ബ്രഷ് മാറ്റണം. കൂടുതൽ കാലം ഒരേ ബ്രഷ് ഉപയോഗിക്കുന്നത് അണുബാധയ്ക്കും പല്ല് ദ്രവിക്കലിനും കാരണമാകും. കൂടാതെ, പല്ലുകളിൽ നിന്നും മോണകളിൽ നിന്നും ഫലകവും (Plaque) ബാക്ടീരിയയും നീക്കം ചെയ്യാനുള്ള ബ്രഷിൻ്റെ ശേഷി നഷ്ടപ്പെടുകയും ദന്തസംബന്ധമായ പ്രശ്‌നങ്ങൾ വർധിക്കുകയും ചെയ്യും.

ജലദോഷം, പനി, വൈറൽ അണുബാധ പോലുള്ള പകർച്ചവ്യാധികൾ വന്നുപോയതിന് ശേഷം ടൂത്ത് ബ്രഷ് നിർബന്ധമായും മാറ്റണം. ഓറൽ സർജറി, റൂട്ട് കനാൽ തെറാപ്പി, മോണരോഗത്തിനുള്ള ചികിത്സ തുടങ്ങിയ ചില ദന്ത ചികിത്സകൾക്ക് ശേഷവും ബ്രഷ് മാറ്റി ഉപയോഗിക്കാൻ ശ്രദ്ധിക്കണം.

ബ്രഷിങിൽ ശ്രദ്ധിക്കേണ്ട കാര്യങ്ങള്‍- ദിവസവും രണ്ടുതവണ ബ്രഷിങ്: പല്ലുകളുടെ ആരോഗ്യത്തിനായി രാവിലെയും വൈകുന്നേരവും പല്ലുതേക്കുന്നത് ശീലമാക്കുക.

ബ്രഷ് തെരഞ്ഞെടുക്കുമ്പോൾ: കട്ടികൂടിയ നാരുകളുള്ള (Hard Bristles) ബ്രഷുകൾ ഒഴിവാക്കണം. കട്ടിയുള്ള നാരുകൾ മോണകളിൽ കേടുപാടുകൾ ഉണ്ടാക്കാനും ഇനാമൽ നശിപ്പിക്കാനും സാധ്യതയുണ്ട്.

അമിത ബ്രഷിങ് ഒഴിവാക്കുക: ഒരുപാട് നേരം ബ്രഷ് ചെയ്യുന്നത് ബ്രഷിൻ്റെ നാരുകൾ വളയാനും അത് മോണകൾക്ക് കേടുവരുത്താനും സാധ്യതയുണ്ട്.