ഇന്ത്യൻ കുട്ടികളിൽ പൊണ്ണത്തടി പടരുന്നു; ബാധിക്കുന്നത് തലച്ചോറിനെയും ബുദ്ധിശക്തിയെയും; 2025-ൽ 41 ദശലക്ഷം പേർക്ക് അമിതഭാരം

ന്യൂഡൽഹി: ഇന്ത്യയിലെ കുട്ടികൾക്കിടയിൽ പൊണ്ണത്തടി ഒരു പകർച്ചവ്യാധി പോലെ പടരുകയാണെന്ന് റിപ്പോർട്ടുകൾ. അമിതഭാരമുള്ള കുട്ടികളുടെ എണ്ണത്തിൽ ലോകത്ത് രണ്ടാം സ്ഥാനത്താണ് നിലവിൽ ഇന്ത്യ. വേൾഡ് ഒബിസിറ്റി ഫെഡറേഷന്റെ കണക്കുകൾ പ്രകാരം പ്രതിവർഷം അഞ്ച് ശതമാനം എന്ന തോതിലാണ് രാജ്യത്ത് ഈ നിരക്ക് വർധിക്കുന്നത്. കേവലം ശാരീരിക പ്രശ്നം എന്നതിലുപരി വികസിച്ച് കൊണ്ടിരിക്കുന്ന കുട്ടികളുടെ തലച്ചോറിനെയും മാനസിക പ്രവർത്തനങ്ങളെയും പൊണ്ണത്തടി ഗുരുതരമായി ബാധിക്കുന്നുവെന്ന് പഠനങ്ങൾ മുന്നറിയിപ്പ് നൽകുന്നു.

ബുദ്ധിശക്തിയെ ബാധിക്കുന്നത് എങ്ങനെ?

പൊണ്ണത്തടി ശരീരത്തിൽ വീക്കമുണ്ടാക്കുകയും ഇൻസുലിൻ പ്രതിരോധത്തിന് കാരണമാവുകയും ചെയ്യുന്നു. ഇത് തലച്ചോറിലെ നാഡീ പാതകളെയും പ്ലാസ്റ്റിസിറ്റിയെയും തകർക്കും.

അമിത കൊഴുപ്പ് മൂലം ഉണ്ടാകുന്ന ഓക്സിഡേറ്റീവ് സമ്മർദ്ദം ന്യൂറോണുകൾ തമ്മിലുള്ള ആശയവിനിമയം തടസ്സപ്പെടുത്തും. ഇത് ഓർമ്മശക്തി, തീരുമാനമെടുക്കാനുള്ള കഴിവ്, ആസൂത്രണം എന്നിവയെ പ്രതികൂലമായി ബാധിക്കുന്നു.

ശ്രദ്ധ കേന്ദ്രീകരിക്കാനും പ്രശ്നങ്ങൾ പരിഹരിക്കാനുമുള്ള കുട്ടികളുടെ കഴിവിനെ പൊണ്ണത്തടി മന്ദീഭവിപ്പിക്കുന്നു.

2025-ലെ കണക്കനുസരിച്ച് 5 മുതൽ 19 വയസ്സ് വരെയുള്ള 41 ദശലക്ഷത്തിലധികം കുട്ടികൾ ഇന്ത്യയിൽ അമിതഭാരമുള്ളവരാണ്. ഇതിൽ 5-9 പ്രായത്തിലുള്ള 14.92 ദശലക്ഷം കുട്ടികളും 10-19 പ്രായത്തിലുള്ള 26.40 ദശലക്ഷം കൗമാരക്കാരും ഉൾപ്പെടുന്നു. 2040 ആകുമ്പോഴേക്കും ഇന്ത്യൻ യുവജനങ്ങളിൽ ജീവിതശൈലീ രോഗങ്ങൾ വൻതോതിൽ വർധിക്കാൻ ഇത് കാരണമാകും.

സംസ്കരിച്ച ഭക്ഷണങ്ങൾ, അമിത പഞ്ചസാര, അനാരോഗ്യകരമായ കൊഴുപ്പ് എന്നിവയടങ്ങിയ പുതിയ കാലത്തെ ഡയറ്റും വ്യായാമമില്ലാത്ത ജീവിതശൈലിയുമാണ് പ്രധാന വില്ലന്മാർ. ഒമേഗ-3 ഫാറ്റി ആസിഡുകൾ, ആന്റിഓക്‌സിഡന്റുകൾ, വിറ്റാമിനുകൾ എന്നിവയടങ്ങിയ ഭക്ഷണം തലച്ചോറിന്റെ പ്രവർത്തനത്തെ സഹായിക്കും. ശാരീരിക അധ്വാനം രക്തചംക്രമണം മെച്ചപ്പെടുത്തുകയും പുതിയ ന്യൂറോണുകളുടെ ഉത്പാദനത്തെ ഉത്തേജിപ്പിക്കുകയും ചെയ്യും.