ഉന്മാദം' ആദ്യ ഗാനം പുറത്തിറങ്ങി; ദുരൂഹത നിറച്ച് കുഞ്ചാക്കോ ബോബന്റെ പുതിയ ചിത്രം

കൊച്ചി: കുഞ്ചാക്കോ ബോബനും ലിജോമോൾ ജോസും ആദ്യമായി ഒന്നിക്കുന്ന 'ഉന്മാദം' എന്ന ചിത്രത്തിലെ ആദ്യ ഗാനം പുറത്തിറങ്ങി. 'അകലെ ഒരു സ്വർണ്ണ കലമാനോ…' എന്ന് തുടങ്ങുന്ന ഗാനം സംഗീത സംവിധായകൻ ബിജിബാൽ ആലപിച്ചിരിക്കുകയാണ്. വിനായക് ശശികുമാർ എഴുതിയ വരികൾക്ക് സംഗീതം നൽകിയിരിക്കുന്നത് മുജീബ് മജീദാണ്. ജൂലൈ 31-നാണ് ചിത്രം ലോകമെമ്പാടും റിലീസ് ചെയ്യുന്നത്.

ഗാനത്തിലെ 'ഇതുവരെയാരും പറയാക്കഥയിത്, ഇരുളിൻ മറവിലെ മായക്കഥ' എന്ന വരികൾ ചിത്രത്തിന്റെ ദുരൂഹമായ കഥാപശ്ചാത്തലത്തെ സൂചിപ്പിക്കുന്നതാണ്. കുഞ്ചാക്കോ ബോബൻ അവതരിപ്പിക്കുന്ന ഷെല്ലി എന്ന കഥാപാത്രത്തിന്റെ അച്ഛന്റെ മരണത്തിന് ശേഷമുള്ള ചില നിർണായക നിമിഷങ്ങളാണ് ഗാനരംഗങ്ങളിൽ ഉൾപ്പെടുത്തിയിരിക്കുന്നത്.

അടുത്തിടെ പുറത്തിറങ്ങിയ ട്രെയിലർ വ്യത്യസ്തമായ അവതരണവും ശക്തമായ അഭിനയ മുഹൂർത്തങ്ങളും കൊണ്ട് ശ്രദ്ധ നേടിയിരുന്നു. പനോരമ സ്റ്റുഡിയോസിന്റെ മലയാളത്തിലെ മൂന്നാമത്തെ നിർമ്മാണ സംരംഭമായ ഈ ചിത്രം, ശ്രദ്ധേയനായ എഡിറ്റർ കിരൺ ദാസ് ആദ്യമായി സംവിധാനം ചെയ്യുന്ന സിനിമ കൂടിയാണ്.

അന്ധവിശ്വാസവുമായി ബന്ധപ്പെട്ട ദുരൂഹമായ ഒരു കേസിന്റെ അന്വേഷണത്തിലേക്ക് കടന്നുചെല്ലുന്ന വ്യത്യസ്തനായ ഒരു പൊലീസ് ഉദ്യോഗസ്ഥനെയാണ് കുഞ്ചാക്കോ ബോബൻ ചിത്രത്തിൽ അവതരിപ്പിക്കുന്നത്. ഒരു പൊലീസ് സ്റ്റേഷനിലെ നിഗൂഢമായ ഫയലിനെ ചുറ്റിപ്പറ്റി വികസിക്കുന്ന സംഭവവികാസങ്ങളാണ് ചിത്രത്തിന്റെ പ്രധാന പ്രമേയം. ട്രെയിലറിനും ഇപ്പോൾ പുറത്തിറങ്ങിയ ഗാനത്തിനും മികച്ച പ്രതികരണമാണ് സോഷ്യൽ മീഡിയയിൽ ലഭിക്കുന്നത്.