ഇടുക്കിയിൽ ആൺകുട്ടിയെ ക്രൂരമായി മർദ്ദിച്ചതിന് അച്ഛനും രണ്ടാനമ്മയ്ക്കും കഠിന തടവ്

ഇടുക്കി: കുമളിയിൽ അഞ്ചുവയസ്സുകാരൻ ഷഫീഖിനെ പിതാവും രണ്ടാനമ്മയും ചേർന്ന് ക്രൂരമായി ആക്രമിച്ച കേസിൽ 11 വർഷത്തിന് ശേഷം തൊടുപുഴ ഒന്നാം അഡീഷണൽ സെഷൻസ് കോടതി ജഡ്ജി ആഷ് കെ ബാൽ ഇരുവർക്കും കഠിന തടവിന് ശിക്ഷ വിധിച്ചു.

ഷഫീഖിൻ്റെ പിതാവായ ഒന്നാം പ്രതി കുമളി സ്വദേശി ഷെരീഫിനെ ഏഴു വർഷത്തെ കഠിന തടവിനും 50,000 രൂപ പിഴയ്ക്കും ശിക്ഷിച്ചു. പണം അടച്ചില്ലെങ്കിൽ ഒരു വർഷം കൂടി കഠിന തടവ് അനുഭവിക്കണം. രണ്ടാം പ്രതി ഷഫീഖിൻ്റെ രണ്ടാനമ്മ അനീഷയെ 10 വർഷത്തെ കഠിന തടവിനും രണ്ടു ലക്ഷം രൂപ പിഴയ്ക്കും ശിക്ഷിച്ചു. വീഴ്ച വരുത്തിയാൽ രണ്ടുവർഷം കഠിനതടവ് കൂടി അനുഭവിക്കണമെന്നും കോടതി ഉത്തരവിൽ പറയുന്നു.

2013 ജൂലൈ 15നാണ് തലയ്ക്ക് ഗുരുതരമായി പൊള്ളലേറ്റ് എല്ലുകൾക്ക് പൊട്ടലുമായി ഷഫീഖിനെ ആശുപത്രിയിൽ പ്രവേശിപ്പിച്ചത്. ഗോവണിയിൽ നിന്ന് വീണാണ് ഷഫീഖിന് പരിക്കേറ്റതെന്ന് ഷെരീഫ് പറഞ്ഞു. എന്നാൽ, ക്രൂരമായ പീഡനത്തിനിരയായതായി ഡോക്ടർമാർ തിരിച്ചറിഞ്ഞതായിരുന്നു കേസിന് വഴിത്തിരിവ് ഉണ്ടാക്കിയത്.

തുടർന്ന് നടത്തിയ പോലീസ് അന്വേഷണത്തിൽ കുട്ടിയെ ദിവസങ്ങളോളം പട്ടിണിയിലാക്കുകയും ക്രൂരമായി പീഡിപ്പിക്കുകയും ചെയ്തതായി കണ്ടെത്തിയിരുന്നു. ശേഷം ഷെരീഫിനെയും അനീഷയെയും പോലീസ് അറസ്റ്റ് ചെയ്യുകയായിരുന്നു. തലയ്ക്ക് ആഴത്തിലുള്ള ക്ഷതമേറ്റ് 75% മസ്തിഷ്ക രക്തസ്രാവത്തിന് ഇരയായ ഷഫീഖ് ഗുരുതരാവസ്ഥയിൽ തുടർന്നു. മസ്തിഷ്ക മരണം സംഭവിക്കുമെന്ന് ഡോക്ടർമാർ മുന്നറിയിപ്പ് നൽകിയെങ്കിലും ഷഫീഖ് രക്ഷപ്പെട്ടു.

വെല്ലൂരിലെ ക്രിസ്ത്യൻ മെഡിക്കൽ കോളജ് ആശുപത്രിയിൽ ചികിൽസയിലായിരുന്ന ഷഫീഖിൻ്റെ രക്ഷാകർതൃത്വം ഏറ്റെടുക്കാൻ ബന്ധുക്കൾ വിമുഖത കാട്ടിയതിനെ തുടർന്ന് 2013ൽ സംസ്ഥാന സർക്കാർ നിയോഗിച്ച രാഗിണി എ എച്ച് എന്ന കെയർടേക്കറാണ് ഷഫീഖിനെ പരിപാലിക്കുന്നത്.