ദിലീപിന്‍റെ പുതിയ വാഹനം 'ഇന്നോവ ഹൈക്രോസ്'

ജനപ്രിയ നടൻ ദിലീപ് ടൊയോട്ടയുടെ ഏറ്റവും പുതിയ മോഡലായ ഇന്നോവ ഹൈക്രോസ് സ്വന്തമാക്കി. വെള്ള നിറത്തിലുള്ള വാഹനമാണ് ദിലീപ് തിരഞ്ഞെടുത്തത്. ഇന്നോവയുടെ അഞ്ചാം തലമുറ വാഹനമായ ഹൈക്രോസ്, മികച്ച രൂപകൽപ്പനയും ഹൈബ്രിഡ് സാങ്കേതികവിദ്യയും സമന്വയിപ്പിച്ച മോഡലാണ്. ഇന്നോവ ഹൈക്രോസ് 7 സീറ്റർ, 8 സീറ്റർ കോൺഫിഗറേഷനുകളിൽ ലഭ്യമാണ്. വിപണിയിൽ 19.77 ലക്ഷം രൂപ മുതൽ 30.98 ലക്ഷം രൂപ വരെയാണ് ഈ എം.പി.വിക്ക് വില വരുന്നത്.

ഹൈക്രോസിൻ്റെ പ്രധാന ആകർഷണം അതിൻ്റെ ശക്തമായ ഹൈബ്രിഡ് പവർട്രെയിനാണ്. 2.0 ലീറ്റർ ഫോർ സിലിണ്ടർ പെട്രോൾ എഞ്ചിനൊപ്പം സ്ട്രോങ് ഹൈബ്രിഡ് ഇലക്ട്രിക് സിസ്റ്റവും ഉൾപ്പെടുത്തിയിരിക്കുന്നു. ഇവ രണ്ടും ചേർന്ന് 184 bhp (ബ്രേക്ക് ഹോഴ്സ് പവർ) കരുത്താണ് വാഹനത്തിന് നൽകുന്നത്. ഇ.സി.വി.ടി. (e-CVT) ഓട്ടോമാറ്റിക് ഗിയർബോക്സാണ് എഞ്ചിനുമായി ബന്ധിപ്പിച്ചിരിക്കുന്നത്.

ഹൈബ്രിഡ് സംവിധാനത്തിൻ്റെ സഹായത്തോടെ ലിറ്ററിന് 23.34 കിലോമീറ്റർ എന്ന മികച്ച ഇന്ധനക്ഷമതയും ഈ വാഹനത്തിന് ലഭിക്കുന്നുണ്ട്. ഹൈബ്രിഡ് സംവിധാനമില്ലാത്ത 2.0 ലീറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ മാത്രമായും ഹൈക്രോസ് ടൊയോട്ട പുറത്തിറക്കുന്നുണ്ട്. ഈ മോഡൽ 173 bhp കരുത്തും പരമാവധി 209 Nm ടോർക്കും പുറത്തെടുക്കും.

സി.വി.ടി. (CVT) ഓട്ടോമാറ്റിക് ഗിയർബോക്സാണ് ഈ എഞ്ചിനുമായി ചേർത്തിരിക്കുന്നത്. ഇതിൻ്റെ ഇന്ധനക്ഷമത ലിറ്ററിന് 16.13 കിലോമീറ്ററാണ്. പുതിയ തലമുറ ഇന്നോവ മോഡലുകളിലൂടെ ആഢംബരവും പ്രകടനക്ഷമതയും ഒരേപോലെ നിലനിർത്താൻ ടൊയോട്ട ശ്രമിക്കുമ്പോൾ, ഈ ഹൈബ്രിഡ് എം.പി.വി. താരങ്ങളുടെ ഗരാജിലെ ഏറ്റവും പുതിയ ശ്രദ്ധാകേന്ദ്രമായി മാറിയിരിക്കുകയാണ്.