പിണറായി ആക്രമണക്കേസ്: വ്യോമയാന വകുപ്പ് ഒഴിവാക്കി കുറ്റപത്രം, വീണ്ടും ചർച്ചയായി കേസ്

തിരുവനന്തപുരം: മുൻ മുഖ്യമന്ത്രി പിണറായി വിജയനെ വിമാനത്തിനുള്ളിൽ വച്ച് ആക്രമിക്കാൻ ശ്രമിച്ചെന്ന കേസിൽ മൂന്ന് വർഷത്തിന് ശേഷം കുറ്റപത്രം സമർപ്പിച്ചു. വ്യോമയാന നിയമ വകുപ്പുകൾ ഒഴിവാക്കിയാണ് പുതിയ കുറ്റപത്രം സമർപ്പിച്ചിരിക്കുന്നത്.

കെ.എസ്. ശബരീനാഥൻ ഉൾപ്പെടെ നാല് പേരാണ് കേസിലെ പ്രതികൾ. ഇൻഡിഗോ വിമാനത്തിനുള്ളിൽ വച്ച് പിണറായി വിജയനെ വധിക്കാൻ ശ്രമിച്ചുവെന്നാണ് കുറ്റപത്രത്തിൽ പറയുന്നത്.

വ്യോമയാന വകുപ്പുകൾ ചുമത്താൻ പ്രോസിക്യൂഷൻ കേന്ദ്ര സർക്കാരിന്റെ അനുമതി തേടിയിരുന്നെങ്കിലും അത് നിരസിക്കപ്പെട്ടു. ഇതോടെ കുറ്റപത്രം സമർപ്പിക്കൽ വൈകുകയും പിന്നീട് ഇന്ത്യൻ ശിക്ഷാനിയമത്തിലെ വകുപ്പുകൾ ഉൾപ്പെടുത്തി കുറ്റപത്രം സമർപ്പിക്കുകയുമായിരുന്നു.

തിരുവനന്തപുരം പ്രിൻസിപ്പൽ സെഷൻസ് കോടതിയാണ് കേസ് പരിഗണിക്കുന്നത്. 2022 ജൂൺ 13നാണ് കേസിന് ആസ്പദമായ സംഭവം നടന്നത്.