ടൈപ്പിസ്റ്റ്, ഓഫീസ് അറ്റന്‍‍ഡന്‍റ് തസ്തികകള്‍; യൂണിയനുകളുടെ സമ്മര്‍ദ്ദത്തില്‍ സര്‍ക്കാരിന്‍റെ പുതിയ ഉത്തരവില്‍ മാറ്റം

തിരുവനന്തപുരം: ഇ- ഓഫീസ് സൗകര്യമുള്ള കാര്യാലയങ്ങളില്‍ ടൈപ്പിസ്റ്റുകളുടെയും ഓഫീസ് അറ്റൻഡന്‍റുകളുടെയും സ്ഥിരനിയമനം നിയന്ത്രിച്ചുകൊണ്ട് മാർച്ച് 20 ന് ധനകാര്യവകുപ്പ് പുറപ്പെടുവിച്ച നിർണായക ഉത്തരവ് അഞ്ച് ദിവസത്തിനുള്ളിൽ തന്നെ റദ്ദാക്കിയെന്ന് റിപ്പോർട്ട്. ദ ടൈംസ് ഓഫ് ഇന്ത്യയാണ് റിപ്പോർട്ട് പുറത്തുവിട്ടിരിക്കുന്നത്.

ഇ- ഓഫീസ് സംവിധാനം പ്രവർത്തിക്കുന്ന കാര്യാലയങ്ങളില്‍, ടൈപ്പിസ്റ്റ്, ഓഫീസ് അറ്റൻഡന്‍റ് തസ്തികകളുടെ ആവശ്യകത ഗണ്യമായി കുറഞ്ഞു. അതിനാൽ, ഒഴിവാക്കാനാകാത്ത സാഹചര്യങ്ങളിലും കരാർ അടിസ്ഥാനത്തിലും മാത്രമേ ഈ വിഭാഗങ്ങളിലെ ഒഴിവുകൾ നികത്താവൂ എന്ന് പ്രാരംഭ ഉത്തരവിൽ വകുപ്പ് പറഞ്ഞിരുന്നു.

എന്നാൽ ഇടതുപക്ഷ അനുകൂല സംഘടനകൾ ഉൾപ്പെടെയുള്ള വലിയ സ്വാധീനമുള്ള ജീവനക്കാരുടെ യൂണിയനുകൾ ശക്തമായി ഈ ഉത്തരവിനെ എതിർത്തു. നിയന്ത്രണങ്ങൾ പിൻവലിക്കണമെന്ന് സർക്കാരിനോട് ആവശ്യപ്പെട്ടു. സിവിൽ സർവീസിലെ എല്ലാ ഒഴിവുകളും പബ്ലിക് സർവീസ് കമ്മീഷൻ വഴി നികത്തണമെന്ന സർക്കാരിന്‍റെ പ്രഖ്യാപിത നിലപാടിന് വിരുദ്ധമാണ് ഈ നിർദേശമെന്ന് ആരോപിച്ച് എൻ‌.ജി‌.ഒ. യൂണിയൻ മുഖ്യമന്ത്രിക്ക് അയച്ച കത്തിൽ ഈ തസ്തികകൾ സംരക്ഷിക്കണമെന്ന് ആവശ്യപ്പെട്ടു.

തുടർന്ന് സര്‍ക്കാര്‍ ആദ്യത്തെ ഉത്തരവില്‍ നിന്ന് പിന്‍വാങ്ങി. ഭേദഗതി ഉത്തരവിൽ ‘കരാർ നിയമനം’ എന്ന പ്രയോഗം പൂർണമായി ഒഴിവാക്കിയിട്ടുണ്ട്. ടൈപ്പിസ്റ്റ്, ഓഫീസ് അറ്റൻഡന്‍റ് തസ്തികകളിൽ ജീവനക്കാരുടെ ആവശ്യകത കുറഞ്ഞിരിക്കുന്ന സാഹചര്യത്തിൽ അനിവാര്യമായ തസ്തികകളുടെ എണ്ണം വകുപ്പ് മേധാവികൾക്ക് കണക്കാക്കണമെന്ന് നിർദേശിച്ചു. അധിക തസ്തികകൾക്ക് പകരം സർക്കാരിന് സാമ്പത്തികബാധ്യത വരാത്തരീതിയിൽ കാലികപ്രസക്തിയുള്ള പുതിയ തസ്തികകൾ സൃഷ്ടിക്കാനാനുള്ള സാധ്യതകൾ ഭരണവകുപ്പ് പരിശോധിക്കുമെന്നും പുതിയ ഉത്തരവിൽ പറയുന്നു. 

ഈ ഭേദഗതി ഒഴികെ, സാമ്പത്തികഞെരുക്കം മറികടക്കാൻ നൽകിയിട്ടുള്ള നിർദേശങ്ങളെല്ലാം നിലനിൽക്കുമെന്നും പറഞ്ഞിട്ടുണ്ട്. സംസ്ഥാന ധനകാര്യത്തെക്കുറിച്ചുള്ള ലഭ്യമായ ഡാറ്റ പ്രകാരം, കേരളത്തിന്‍റെ വായ്പകളുടെ 87 ശതമാനവും ശമ്പളം, പെൻഷൻ, പലിശ എന്നിവയ്ക്കായി ഉപയോഗിക്കുന്നു. വികസനത്തിനായി 13% മാത്രമേ അവശേഷിക്കുന്നുള്ളൂവെന്നും ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. കൂടാതെ, ധനകാര്യവിദഗ്ധരുടെ അഭിപ്രായത്തിൽ, ഒരു ലക്ഷം ജനസംഖ്യയ്ക്ക് സംസ്ഥാനത്തെ ഉദ്യോഗസ്ഥവൃന്ദത്തിന്‍റെ എണ്ണം വ്യക്തമാണ്. കർണാടകയേക്കാൾ 86% വും തെലങ്കാനയേക്കാൾ 25% വും കൂടുതൽ സർക്കാർ ജീവനക്കാരാണ് കേരളത്തിലുള്ളത്.

മുന്‍ ഐ.എ.എസ്. ഉദ്യോഗസ്ഥനും പതിനൊന്നാം സംസ്ഥാന ശമ്പള കമ്മീഷന്‍റെ മുൻ ചെയർമാനുമായ കെ. മോഹൻദാസ് ഈ പുനഃപരിശോധനയെ വിമര്‍ശിച്ച് രംഗത്തെത്തി. "ടൈപ്പിസ്റ്റുകൾ, ഓഫീസ് അസിസ്റ്റന്‍റുമാർ തുടങ്ങിയ തസ്തികകൾ അനാവശ്യമാണ്. ഈ തസ്തികകളിലേയ്ക്കുള്ള നിയമനം ഉടൻ നിർത്തിവയ്ക്കണം. ഒരു സ്വതന്ത്ര ഏജൻസി എല്ലാ അപ്രസക്തമായ സർക്കാർ തസ്തികകളും തലങ്ങളും പ്രവർത്തനങ്ങളും സമഗ്രമായി വിലയിരുത്തണം." ഇതുകൂടാതെ, അനാവശ്യമായ റോളുകളുടെ അനിയന്ത്രിതമായ വികാസം ദീർഘകാലാടിസ്ഥാനത്തിൽ സർക്കാരിന്‍റെ നിലനിൽപ്പിന് തന്നെ ഗുരുതരമായ ഭീഷണി ഉയർത്തുമെന്ന്, മോഹന്‍ദാസ് വ്യക്തമാക്കിയതായി ടൈംസ് ഓഫ് ഇന്ത്യ പരാമര്‍ശിച്ചു.

മുൻ മുഖ്യമന്ത്രി വി.എസ്. അച്യുതാനന്ദന്‍റെ നേതൃത്വത്തിലുള്ള നാലാമത്തെ ഭരണപരിഷ്കാരകമ്മീഷൻ പോലും അനാവശ്യമായ സർക്കാർ തസ്തികകൾ വ്യവസ്ഥാപിതമായി തിരിച്ചറിയാനും നിർത്തലാക്കാനും ശുപാർശ ചെയ്തിട്ടുണ്ട്. അപ്രസക്തമായ റോളുകൾ കൃത്യമായി കണ്ടെത്തുന്നതിന് സ്പാർക്ക് (സംസ്ഥാന സർക്കാർ ജീവനക്കാർക്ക് ശമ്പളം നൽകാൻ ഉപയോഗിക്കുന്ന സോഫ്റ്റ്‌വെയർ) ഡാറ്റാബേസ് ഉപയോഗിക്കാൻ കമ്മീഷൻ നിർബന്ധിക്കുകയും യോഗ്യതകളുടെയും വകുപ്പുതല ആവശ്യങ്ങളുടെയും അടിസ്ഥാനത്തിൽ ജീവനക്കാരെ പുനർവിന്യസിക്കാൻ നിർദേശിക്കുകയും ചെയ്തിരുന്നു. എന്നിരുന്നാലും, ഏറ്റവും പുതിയ മാറ്റത്തോടെ, ആ ശുപാർശകൾ വലിയതോതിൽ അവഗണിക്കപ്പെട്ടതായി റിപ്പോര്‍ട്ടുകള്‍ സൂചിപ്പിക്കുന്നു. 

വർധിച്ചുവരുന്ന സാമ്പത്തിക പ്രതിസന്ധിക്കിടയിലും യൂണിയൻ സ്വാധീനത്തെ വെല്ലുവിളിക്കാൻ സംസ്ഥാന സർക്കാർ തയ്യാറാകുന്നില്ലെന്നതാണ് പുതിയ വിവരങ്ങളിലൂടെ വ്യക്തമാകുന്നത്. പുതുക്കിയ ഉത്തരവ് ഒരു താത്കാലിക സമാധാന ഉടമ്പടിയായി വർത്തിക്കും. എങ്കിലും, സാമ്പത്തിക ഏകീകരണം കൈവരിക്കുന്നതിനുള്ള പ്രധാന ശുപാർശകളിലൊന്ന് കേരളത്തിന്‍റെ ആഴത്തിലുള്ള സാമ്പത്തിക ദുരിതങ്ങൾ പരിഹരിക്കുന്നതിന് ഒരു പരിഹാരവും നൽകുന്നില്ലെന്നതാണ്. സുസ്ഥിരമല്ലാത്ത വായ്പാ വർധനവിന്‍റെയും ഭരണപരമായ വീർപ്പുമുട്ടലിന്‍റെയും പാതയിലൂടെ സംസ്ഥാനം തുടരുന്നതിനാൽ കൂടുതൽ പരിഷ്കാരങ്ങൾക്കുള്ള സാധ്യത വർധിച്ചുവരുന്നതായും വിലയിരുത്തപ്പെടുന്നു.