സതീശന്റെ സ്ഥാനാരോഹണം: അതൃപ്തി പരസ്യമാക്കി ചെന്നിത്തല; ഗുരുവായൂരിലേക്ക് മടക്കം

തിരുവനന്തപുരം | 14 മെയ്, 2026

​കേരളത്തിന്റെ പുതിയ മുഖ്യമന്ത്രിയായി വി.ഡി. സതീശനെ രാഹുൽ ഗാന്ധിയും മല്ലികാർജുൻ ഖാർഗെയും ഔദ്യോഗികമായി പ്രഖ്യാപിച്ചതോടെ കോൺഗ്രസിനുള്ളിൽ നാടകീയ നീക്കങ്ങൾ. ഹൈക്കമാൻഡ് തീരുമാനം പുറത്തുവന്നതിന് പിന്നാലെ മുതിർന്ന നേതാവ് രമേശ് ചെന്നിത്തല കടുത്ത അതൃപ്തി രേഖപ്പെടുത്തി രംഗത്തെത്തി. പ്രഖ്യാപനത്തിന് തൊട്ടുപിന്നാലെ തന്റെ ഔദ്യോഗിക വസതിയുടെ പിൻവാതിലിലൂടെ പുറത്തേക്ക് പോയ അദ്ദേഹം, നിർണ്ണായകമായ നിയമസഭാ കക്ഷി യോഗത്തിൽ നിന്നും വിട്ടുനിന്നു എന്നത് രാഷ്ട്രീയ വൃത്തങ്ങളിൽ ചർച്ചയായിട്ടുണ്ട്. നേരിട്ട് ഹാജരാകുന്നതിന് പകരം വി.ഡി. സതീശനെ പിന്തുണച്ചുകൊണ്ടുള്ള കത്ത് കൈമാറുകയാണ് അദ്ദേഹം ചെയ്തത്.

​സീനിയോറിറ്റി പൂർണ്ണമായും അവഗണിക്കപ്പെട്ടുവെന്ന വികാരമാണ് ചെന്നിത്തലയെ ചൊടിപ്പിച്ചത്. തിരുവനന്തപുരത്തുനിന്നും ഹരിപ്പാട് വഴി അദ്ദേഹം നേരെ ഗുരുവായൂരിലേക്ക് തിരിച്ചതായാണ് വിവരം. നാളെ മലയാള മാസം ഒന്നാം തീയതിയായതിനാലുള്ള പതിവ് ക്ഷേത്ര ദർശനം മാത്രമാണിതെന്ന് അദ്ദേഹത്തോട് അടുത്ത വൃത്തങ്ങൾ വിശദീകരിക്കുന്നുണ്ടെങ്കിലും, നിലവിലെ രാഷ്ട്രീയ സാഹചര്യത്തിൽ ഈ യാത്രയ്ക്ക് വലിയ പ്രാധാന്യമുണ്ട്. പുതിയ മുഖ്യമന്ത്രിയെ അഭിനന്ദിച്ചുകൊണ്ട് ഒരു ഫേസ്ബുക്ക് കുറിപ്പ് പോലും പങ്കുവെക്കാൻ ഇതുവരെ അദ്ദേഹം തയ്യാറാകാത്തത് പാർട്ടിയിലെ ഭിന്നതയുടെ ആഴം വ്യക്തമാക്കുന്നു

.