ഫിനാൻസ് ബിൽ പാസായാൽ ചർച്ചയ്ക്ക് എന്ത് പ്രസക്തി? സർക്കാരിനെതിരെ പിണറായി

തിരുവനന്തപുരം: വീര്യം കുറഞ്ഞ മദ്യത്തിന് നികുതിയിളവ് നൽകാനുള്ള നിർദേശം ധനകാര്യ ബില്ലിൽ ഉൾപ്പെടുത്തിയ സർക്കാർ നടപടിക്കെതിരെ പ്രതിപക്ഷ നേതാവ് പിണറായി വിജയൻ. ബിൽ സഭ പാസാക്കിയാൽ നികുതിയിളവ് നിയമമാകുമെന്നും, പിന്നീട് അത് നടപ്പാക്കുന്നത് തടയാൻ യുഡിഎഫിന് നിയമപരമായി കഴിയില്ലെന്നും അദ്ദേഹം പറഞ്ഞു.

ഫിനാൻസ് ബില്ലിൽ നികുതിയിളവ് ഉൾപ്പെടുത്തിയ ശേഷം യുഡിഎഫ് ചർച്ച നടത്തുന്നതിന് എന്താണ് പ്രസക്തിയെന്നും പിണറായി ചോദിച്ചു. മദ്യക്കമ്പനികളുടെ ആവശ്യം അംഗീകരിക്കാനുള്ള നീക്കമാണ് ഇതിന് പിന്നിലെന്നും അദ്ദേഹം ആരോപിച്ചു.

ബജറ്റ് പ്രഖ്യാപനങ്ങളെ ന്യായീകരിച്ച മുഖ്യമന്ത്രി, മദ്യനികുതിയിളവിന്റെ കാര്യത്തിൽ മാത്രം "യുഡിഎഫ് തീരുമാനം ആയിട്ടില്ല" എന്ന നിലപാട് സ്വീകരിച്ചതും അദ്ദേഹം വിമർശിച്ചു. പ്രതിപക്ഷം, മാധ്യമങ്ങൾ, മത-സാമുദായിക സംഘടനകൾ എന്നിവയുടെ ശക്തമായ എതിർപ്പിനൊപ്പം കോൺഗ്രസിനകത്തും ഘടകകക്ഷികളിലും ഉയർന്ന പ്രതിഷേധം, നികുതിയിളവ് കൂട്ടായ തീരുമാനമല്ലായിരുന്നുവെന്നതിന്റെ തെളിവാണെന്നും അദ്ദേഹം പറഞ്ഞു.

എക്‌സൈസ് നയത്തിലെ മാറ്റത്തെക്കുറിച്ച് അറിയില്ലെന്ന നിലപാടാണ് എക്‌സൈസ് മന്ത്രിയും സ്വീകരിച്ചതെന്ന് ചൂണ്ടിക്കാട്ടിയ പിണറായി, ധനകാര്യ വകുപ്പ് കൈകാര്യം ചെയ്യുന്ന മുഖ്യമന്ത്രി ഏകപക്ഷീയമായി മദ്യനയത്തിൽ ഇടപെട്ടെന്ന അതൃപ്തി ഭരണപക്ഷത്തിനകത്തും ഉയരുന്നുണ്ടെന്നും പറഞ്ഞു.

ഫിനാൻസ് ബിൽ പാസായ ശേഷം യുഡിഎഫ് ചർച്ച നടത്തുന്നത് വെറും പ്രഹസനമായി മാറുമെന്നും, ധനകാര്യ വകുപ്പ് മറ്റ് വകുപ്പുകളുടെ അഭിപ്രായം മറികടന്ന് പ്രവർത്തിക്കുന്നുവെന്ന ആരോപണവും അദ്ദേഹം ഉന്നയിച്ചു. ഇക്കാര്യം കോൺഗ്രസ് നേതൃത്വം ഗൗരവമായി പരിശോധിക്കണമെന്നും പിണറായി വിജയൻ ആവശ്യപ്പെട്ടു.