"നിരവധി ആളുകളുടെ കഠിനാധ്വാനം തകർക്കരുത്"; ജനനായകൻ തിയേറ്ററിൽ തന്നെ ആസ്വദിക്കണമെന്ന് മമിത ബൈജു

ചെന്നൈ: തമിഴ് സൂപ്പർതാരം വിജയ് നായകനായ 'ജനനായകൻ' എന്ന ചിത്രത്തിന്റെ വ്യാജപതിപ്പ് ഇന്റർനെറ്റിൽ പ്രചരിക്കുന്നതിൽ കടുത്ത നിരാശ രേഖപ്പെടുത്തി അണിയറപ്രവർത്തകർ. ചിത്രത്തിൽ പ്രധാന വേഷത്തിലെത്തിയ മലയാളികളുടെ പ്രിയതാരം മമിത ബൈജു പൈറസിക്കെതിരെ ശക്തമായ പ്രതികരണവുമായി രംഗത്തെത്തി.

സിനിമ നിയമവിരുദ്ധമായി പ്രചരിക്കുന്നത് കാണുന്നത് വലിയ വിഷമമുണ്ടാക്കുന്നുവെന്നും പൈറസിയെ പിന്തുണയ്ക്കരുതെന്നും സോഷ്യൽ മീഡിയയിൽ പങ്കുവെച്ച കുറിപ്പിൽ മമിത ആവശ്യപ്പെട്ടു. ഒരു സിനിമയ്ക്ക് പിന്നിൽ നിരവധി ആളുകളുടെ മാസങ്ങൾ നീണ്ട കഠിനാധ്വാനവും അർപ്പണബോധവുമുണ്ടെന്ന് മമിത ഓർമ്മിപ്പിച്ചു. ഓരോ ദിവസവും അവർ നൽകുന്ന അധ്വാനത്തെ മാനിക്കണം.

സിനിമ ചില നിമിഷങ്ങൾ ബിഗ് സ്ക്രീനിൽ തന്നെ ആസ്വദിക്കാൻ വേണ്ടിയുള്ളതാണ്. അത് മൊബൈൽ ഫോണിലോ കമ്പ്യൂട്ടറിലോ വ്യാജപതിപ്പിലൂടെ കാണുന്നത് നിരാശാജനകമാണ്. സിനിമ ഔദ്യോഗികമായി റിലീസ് ചെയ്യുമ്പോൾ മാത്രം തിയേറ്ററുകളിൽ പോയി കാണാൻ പ്രേക്ഷകർ തയ്യാറാകണം. സിനിമയെയും അതിനു പിന്നിൽ പ്രവർത്തിക്കുന്നവരെയും സംരക്ഷിക്കാൻ പൈറസി ഒഴിവാക്കുക എന്നത് മാത്രമാണ് പോംവഴിയെന്നും താരം കൂട്ടിച്ചേർത്തു.

ചിത്രം റിലീസ് ചെയ്ത് അധികം വൈകാതെ തന്നെ ഹൈ ക്വാളിറ്റി പ്രിന്റുകൾ സൈറ്റുകളിൽ ലഭ്യമായത് തമിഴ് സിനിമാ ലോകത്തെ ഒന്നടങ്കം ഞെട്ടിച്ചിട്ടുണ്ട്. വിജയ് ചിത്രത്തിന് നേരെയുണ്ടായ ഈ നീക്കത്തിനെതിരെ വലിയ പ്രതിഷേധമാണ് സിനിമാ മേഖലയിൽ നിന്ന് ഉയരുന്നത്. സംഭവത്തിൽ നിർമ്മാതാക്കൾ സൈബർ സെല്ലിന് പരാതി നൽകിയിട്ടുണ്ട്.