വണ്ടിപ്പെരിയാറിൽ കല്യാണവിരുന്നിനിടെ കൂട്ടത്തല്ല്; എട്ടുപേർക്ക് പരിക്ക്

ഇടുക്കി വണ്ടിപ്പെരിയാറിൽ നടന്ന ഒരു വിവാഹ സൽക്കാരം അപ്രതീക്ഷിതമായ സംഘർഷത്തിലാണ് അവസാനിച്ചത്. ഗ്രാമ്പി സ്വദേശികളുടെ വിവാഹവിരുന്നിനിടെ വരന്റെ ബന്ധുക്കളും കേറ്ററിംഗ് ജീവനക്കാരും തമ്മിലുണ്ടായ തർക്കം വാക്കേറ്റത്തിലും പിന്നീട് വലിയ കൈയാങ്കളിയിലുമാണ് കലാശിച്ചത്. പള്ളിയിലെ ചടങ്ങുകൾക്ക് ശേഷം നടന്ന ഭക്ഷണത്തിനിടെയാണ് പ്രശ്നങ്ങളുടെ തുടക്കം. വിരുന്നിന്റെ അവസാന ഘട്ടത്തിൽ ഭക്ഷണം കഴിക്കാനെത്തിയ വരന്റെ സഹോദരിയും ഭർത്താവും ഉൾപ്പെടെയുള്ളവർ, ജീവനക്കാർ വൃത്തിയാക്കിക്കൊണ്ടിരുന്ന മേശയിൽ ഇരിക്കാൻ തുനിഞ്ഞതാണ് തർക്കത്തിന് കാരണമായത്. തൊട്ടടുത്ത് വൃത്തിയാക്കിയ മറ്റൊരു മേശയുണ്ടെന്നും അവിടേക്ക് മാറണമെന്നും ജീവനക്കാർ ആവശ്യപ്പെട്ടത് ബന്ധുക്കളെ പ്രകോപിപ്പിച്ചു.

തർക്കം മൂത്തതോടെ പാത്രം ഉപയോഗിച്ച് കേറ്ററിംഗ് ഉടമയുടെ മകന്റെ തലയ്ക്ക് അടിയേറ്റു. ഇതോടെ ഇരുവിഭാഗവും ഏറ്റുമുട്ടുകയായിരുന്നു. സംഘർഷത്തിൽ വരന്റെ സഹോദരീഭർത്താവിനും മൂന്ന് കേറ്ററിംഗ് ജീവനക്കാർക്കും ഉൾപ്പെടെ ആകെ എട്ടുപേർക്ക് പരിക്കേറ്റു. പരിക്കേറ്റവർ വണ്ടിപ്പെരിയാറിലെയും പീരുമേട്ടിലെയും വിവിധ ആശുപത്രികളിൽ ചികിത്സ തേടിയിരിക്കുകയാണ്. ഒരു ആഘോഷമാകേണ്ടിയിരുന്ന വിവാഹവേദി ഇതോടെ സംഘർഷഭരിതമായി മാറി.