സതീശൻ്റെ ഒന്നാം അങ്കം; കിഫ്ബി പൂട്ടുമോ? കേരളത്തെ ഞെട്ടിക്കാൻ യുഡിഎഫിന്റെ ധവളപത്രം; ആദ്യ ബജറ്റ് തീയതി പ്രഖ്യാപിച്ചു!

തിരുവനന്തപുരം: പ്രതീക്ഷിച്ചതുപോലെ, കഴിഞ്ഞ പിണറായി സർക്കാരിന്റെ കാലത്തെ കേരളത്തിന്റെ യഥാർത്ഥ സാമ്പത്തികസ്ഥിതി വ്യക്തമാക്കുന്ന ധവളപത്രം പുറത്തിറക്കുമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചു. യുഡിഎഫ് സർക്കാരിന്റെ ആദ്യ മന്ത്രിസഭാ തീരുമാനങ്ങൾ വിശദീകരിച്ചുകൊണ്ടാണ് ധനമന്ത്രി കൂടിയായ മുഖ്യമന്ത്രി ഇക്കാര്യം അറിയിച്ചത്. രണ്ടാം പിണറായി സർക്കാരിന്റെ അവസാന ബജറ്റിനെതിരെ അന്ന് പ്രതിപക്ഷ നേതാവായിരുന്ന വി.ഡി. സതീശൻ ഉന്നയിച്ച ‘പൂച്ച പെറ്റുകിടക്കുന്ന ഖജനാവ്’ എന്ന വിമർശനത്തിന് പിന്നാലെയാണ് ഈ നീക്കം.

കേരളത്തിലെ തരിപ്പണമായ സമ്പദ്‍വ്യവസ്ഥയെ കരകയറ്റുകയാണ് മുഖ്യലക്ഷ്യമെന്ന് സതീശൻ വ്യക്തമാക്കിയിട്ടുണ്ട്. ഇതിന്റെ ഭാഗമായി ജിഎസ്ടി സമാഹരണം ഊർജിതമാക്കാനും നികുതി കുടിശിക വീണ്ടെടുക്കാനും ശക്തമായ നടപടികളുണ്ടാകും. സംസ്ഥാനത്ത് വൻതോതിൽ നികുതി ചോർച്ചയുണ്ടാകുന്ന സ്വർണ വിപണിയിൽ കള്ളക്കടത്തും സമാന്തര വിൽപനയും തടഞ്ഞ് നികുതി വരുമാനം ഉയർത്താനാണ് സർക്കാർ ലക്ഷ്യമിടുന്നത്. നിയമവിധേയമായി പ്രവർത്തിക്കുന്ന വ്യാപാരികളെ ഉപദ്രവിക്കാതെ, വിമാനത്താവളങ്ങളിലും മറ്റും പ്രത്യേക പരിശോധന നടത്തി കള്ളക്കടത്തിന് തടയിടണമെന്ന് കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷനും (കെജിഎസ്എംഎ) ആവശ്യപ്പെട്ടിട്ടുണ്ട്. കൂടാതെ, സ്റ്റാർട്ടപ്പുകളെ വളർത്തുന്നതിനും കൊച്ചിയും വിഴിഞ്ഞവും ഉൾപ്പെടെയുള്ള തുറമുഖങ്ങളും വിമാനത്താവളങ്ങളും പ്രയോജനപ്പെടുത്തി ലോജിസ്റ്റിക്സ് രംഗത്ത് സംസ്ഥാനത്തെ വളർച്ചയിലേക്ക് നയിക്കാനും സർക്കാർ മുൻഗണന നൽകും.

കിഫ്ബിയിൽ പുനഃക്രമീകരണം; കടബാധ്യത വൻ വെല്ലുവിളി

കിഫ്ബി ബജറ്റിന് പുറത്തുള്ള അധികബാധ്യതയാണെന്ന് സതീശൻ മുൻപ് വിമർശിച്ചിരുന്നെങ്കിലും, യുഡിഎഫ് അധികാരത്തിലേറിയാൽ കിഫ്ബിയെ റദ്ദാക്കില്ലെന്നും പകരം പുനഃക്രമീകരിക്കുന്നത് ആലോചിക്കുമെന്നും അദ്ദേഹം വ്യക്തമാക്കിയിട്ടുണ്ട്. കിഫ്ബി വഴി സംസ്ഥാനം വൻതോതിൽ എടുത്തുകഴിഞ്ഞ കടങ്ങൾ തിരിച്ചടയ്ക്കേണ്ട ബാധ്യത സർക്കാരിനുണ്ട്. കിഫ്ബിയും പെൻഷൻ ഫണ്ട് ബോർഡും എടുത്ത കടംകൂടി ചേർക്കുമ്പോൾ കേരളം കടമെടുപ്പ് പരിധി ലംഘിച്ചെന്നാണ് വിലയിരുത്തൽ.

കേരളത്തിന്റെ കടത്തിന്റെ ഗ്രാഫ് ഇപ്രകാരമാണ്:

• ഒന്നാം പിണറായി സർക്കാർ (തുടക്കം): 1.57 ലക്ഷം കോടി രൂപ

• രണ്ടാം പിണറായി സർക്കാർ (തുടക്കം): 2.96 ലക്ഷം കോടി രൂപ

• 2024 - 25 സാമ്പത്തിക വർഷം: 4.35 ലക്ഷം കോടി രൂപ

• 2025 - 26 ബജറ്റ് പ്രകാരം: 4.88 ലക്ഷം കോടി രൂപ

കോവിഡ് കാലത്ത് ജിഎസ്ഡിപിയുടെ 39 ശതമാനത്തിലേക്ക് ഉയർന്ന കട അനുപാതം നിലവിൽ 33.44 ശതമാനമാണ്. കിഫ്ബി വഴി വികസനത്തിന് പകരം കടബാധ്യതയാണ് കൂടിയതെന്നും, കിഫ്ബിയെ ഇല്ലാതാക്കി നിർമ്മാണ പ്രവർത്തനങ്ങൾ പൊതുമരാമത്ത് വകുപ്പിനെ ഏൽപ്പിക്കുകയാണ് വേണ്ടതെന്നും പ്രമുഖ സാമ്പത്തിക വിദഗ്ധ ഡോ. മേരി ജോർജ് പ്രതികരിച്ചു.

ആദ്യ മന്ത്രിസഭയിൽ തന്നെയെത്തി ജനപ്രിയ പ്രഖ്യാപനങ്ങൾ

കടുത്ത സാമ്പത്തികഞെരുക്കത്തിലും തിരഞ്ഞെടുപ്പ് വാഗ്ദാനങ്ങൾ പാലിച്ചുകൊണ്ടാണ് യുഡിഎഫ് സർക്കാർ തുടക്കമിട്ടിരിക്കുന്നത്. ആദ്യ മന്ത്രിസഭാ യോഗത്തിൽ പ്രഖ്യാപിച്ച പ്രധാന തീരുമാനങ്ങൾ താഴെ പറയുന്നവയാണ്:

• ആശമാരുടെ ഓണറേറിയം 3,000 രൂപയായി ഉയർത്തി.

• അങ്കണവാടി ജീവനക്കാർ, പാചകത്തൊഴിലാളികൾ, പ്രീപ്രൈമറി ടീച്ചർമാർ, ആയമാർ എന്നിവരുടെ വേതനത്തിൽ 1,000 രൂപയുടെ വർദ്ധനവ് വരുത്തി.

• കെഎസ്ആർടിസി ബസുകളിൽ സ്ത്രീകൾക്ക് സൗജന്യയാത്ര നൽകുന്ന പദ്ധതി ജൂൺ 15 മുതൽ പ്രാബല്യത്തിൽ വരും.

ജൂൺ 5-ന് അവതരിപ്പിക്കുന്ന യുഡിഎഫ് സർക്കാരിന്റെ ആദ്യ ബജറ്റിൽ ക്ഷേമ പെൻഷൻ 3,000 രൂപയാക്കൽ, കുടുംബങ്ങൾക്ക് 25 ലക്ഷം രൂപയുടെ ആരോഗ്യ ഇൻഷുറൻസ്, ചെറുകിട സംരംഭങ്ങൾക്ക് 5 ലക്ഷം രൂപ വരെയുള്ള പലിശരഹിത വായ്പ തുടങ്ങിയ വൻ പ്രഖ്യാപനങ്ങളും ഉണ്ടായേക്കുമെന്നാണ് സൂചന.