കളിക്കുന്നില്ലെങ്കിൽ വേണ്ട, പാക് ആവശ്യം തള്ളിയത് ഐ.സി.സിയിലെ ഈ ഇന്ത്യക്കാരൻ

ദുബായ്: ഏഷ്യാ കപ്പ് ക്രിക്കറ്റിലെ ഇന്ത്യ- പാകിസ്ഥാൻ മാച്ച് റഫറിയായിരുന്ന ആൻഡി പൈക്രോഫ്റ്റിനെ ഒഫീഷ്യൽ പാനലിൽ നിന്നു പുറത്താക്കണമെന്ന പാക് ക്രിക്കറ്റ് ബോർഡിന്റെ ആവശ്യം നിരസിച്ചത് ഐ.സി.സിയിലെ ഒരു ഇന്ത്യക്കാരനെന്നു റിപ്പോർട്ട്. ഐ.സി.സി.യുടെ പുതിയ സിഇഒ സൻജോ​ഗ് ​ഗുപ്തയാണെന്നു ക്രിക്ക്ബസ് റിപ്പോർട്ട് ചെയ്യുന്നു. വിഷയത്തിൽ പൈക്രോഫ്റ്റിനു ചെറിയ പങ്ക് മാത്രമേ ഉള്ളുവെന്ന നിലപാടെടുത്താണ് ഐ.സി.സി. ആവശ്യം തള്ളിയത്.

പൈക്രോഫ്റ്റിനെ മാറ്റേണ്ട തക്കതായ കാരണമില്ലെന്നു ചൂണ്ടിക്കാട്ടിയാണ് പി.സി.ബി. ആവശ്യത്തോടു സൻജോ​ഗ് ​ഗുപ്തയുടെ നേതൃത്വത്തിലുള്ള ഐ.സി.സി. സമിതി മുഖം തിരിച്ചത്. ആഭ്യന്തര അന്വേഷണം നടത്തി പെരുമാറ്റച്ചട്ടമോ ഔദ്യോ​ഗിക നടപടിക്രമങ്ങളോ ലംഘിച്ചിട്ടില്ലെന്ന നി​ഗമനത്തിൽ ഐ.സി.സി. എത്തിയെന്നും റിപ്പോർട്ടിലുണ്ട്. ഇതോടെയാണ് പാക് ആവശ്യത്തിനു വഴങ്ങേണ്ടതില്ലെന്ന നിലപാടിലേക്ക് ഐസിസി എത്തിയത്.