പരാജയം സമ്മതിക്കില്ല, രാജിവെക്കില്ല; കേന്ദ്രത്തിനും കമ്മീഷനുമെതിരെ 'യുദ്ധപ്രഖ്യാപനവുമായി' മമത ബാനർജി

ബംഗാൾ നിയമസഭാ തിരഞ്ഞെടുപ്പിൽ നേരിട്ട പരാജയത്തിന് പിന്നാലെ രാഷ്ട്രീയ കേരളത്തെയും ദേശീയ രാഷ്ട്രീയത്തെയും ഒരുപോലെ അമ്പരപ്പിക്കുന്ന പ്രഖ്യാപനമാണ് മുഖ്യമന്ത്രി മമത ബാനർജി നടത്തിയിരിക്കുന്നത്. തന്റെ പരാജയം ജനവിധിയല്ലെന്നും മറിച്ച് ബിജെപിയും തിരഞ്ഞെടുപ്പ് കമ്മീഷനും ചേർന്ന് നടത്തിയ ആസൂത്രിതമായ ഗൂഢാലോചനയുടെ ഫലമാണെന്നും ആരോപിച്ച മമത, യാതൊരു കാരണവശാലും മുഖ്യമന്ത്രി സ്ഥാനം രാജിവയ്ക്കില്ലെന്ന ഉറച്ച നിലപാടിലാണ്. ധാർമ്മിക വിജയം തൃണമൂൽ കോൺഗ്രസിനാണെന്നും സമ്മർദ്ദങ്ങൾക്ക് വഴങ്ങി പടിയിറങ്ങാൻ താൻ തയ്യാറല്ലെന്നും കൊൽക്കത്തയിൽ വിളിച്ചുചേർത്ത വാർത്താ സമ്മേളനത്തിൽ അവർ വ്യക്തമാക്കി.

തിരഞ്ഞെടുപ്പ് കമ്മീഷന്റെ വിശ്വാസ്യതയെ തന്നെ ചോദ്യം ചെയ്യുന്ന ഗുരുതരമായ ആരോപണങ്ങളാണ് മമത ഉയർത്തിയിരിക്കുന്നത്. വോട്ടർ പട്ടികയിൽ നിന്നുള്ള ലക്ഷക്കണക്കിന് ആളുകളുടെ പേര് നീക്കം ചെയ്തതും, ഐഎഎസ്-ഐപിഎസ് ഉദ്യോഗസ്ഥരെ രാഷ്ട്രീയ താൽപ്പര്യങ്ങൾക്ക് അനുസൃതമായി മാറ്റിയതും തിരിച്ചടിയായെന്ന് അവർ വിശ്വസിക്കുന്നു. തന്റെ യഥാർത്ഥ പോരാട്ടം ബിജെപിയോടല്ല, മറിച്ച് തിരഞ്ഞെടുപ്പ് കമ്മീഷനോടായിരുന്നു എന്നാണ് മമതയുടെ പക്ഷം. മഹാരാഷ്ട്രയിലേയും ഹരിയാനയിലേയും സാഹചര്യങ്ങൾ ബംഗാളിലും ആവർത്തിച്ചെന്നും ഏതാണ്ട് നൂറോളം സീറ്റുകൾ തങ്ങളിൽ നിന്ന് തട്ടിയെടുത്തതാണെന്നും അവർ ആരോപിക്കുന്നു.