ഇഡി ഉദ്യോഗസ്ഥർക്ക് നേരെ ആക്രമണം; സിപിഎം ഉന്നത നേതാക്കൾക്ക് ഗൂഢാലോചനയിൽ പങ്കെന്ന് ഇഡി

തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വീട്ടിലെ പരിശോധനയ്ക്കുശേഷം മടങ്ങിയ ഇഡി ഉദ്യോഗസ്ഥർക്കുനേരെയുണ്ടായ ആക്രമണത്തിൽ സിപിഎം ഉന്നത നേതാക്കൾക്ക് പങ്കുണ്ടെന്ന് എൻഫോഴ്‌സ്‌മെന്റ് ഡയറക്ടറേറ്റ് (ഇഡി). ഉന്നത സിപിഎം നേതാക്കൾ ക്രിമിനൽ ഗൂഢാലോചന നടത്തിയെന്നും സംസ്ഥാന സെക്രട്ടറിയുടെ സാന്നിധ്യത്തിലായിരുന്നു ആക്രമണമെന്നും ഇഡി കോടതിയിൽ നൽകിയ തടസഹർജിയിൽ ആരോപിച്ചു. കേസിലെ പ്രതികളുടെ ജാമ്യാപേക്ഷ പരിഗണിക്കുന്നത് വെള്ളിയാഴ്ചത്തേക്ക് മാറ്റി.

സംഭവത്തിൽ ഗൂഢാലോചന നടന്നതിന് തെളിവ് കണ്ടെത്താനായില്ലെന്നായിരുന്നു പൊലീസിന്റെ നേരത്തെ നൽകിയ റിപ്പോർട്ട്. പ്രതികളുടെ ഫോൺ കോളുകളിൽ അസ്വാഭാവികതയില്ലെന്നും കൂടുതൽ ഫോണുകൾ ശാസ്ത്രീയ പരിശോധനയ്ക്ക് അയയ്ക്കുമെന്നും പൊലീസ് കോടതിയെ അറിയിച്ചു. കേസിൽ 20-ലേറെ പേർ ഇനിയും പിടിയിലാകാനുണ്ടെന്നും ഒരാൾ വിദേശത്തേക്ക് കടന്നതായും പൊലീസ് അറിയിച്ചു.

അതേസമയം, കേസിലെ ഒൻപതാം പ്രതി ഹരീഷ് കുമാറിന് അനുവദിച്ച ജാമ്യം റദ്ദാക്കണമെന്ന് ആവശ്യപ്പെട്ട് സർക്കാർ ഹൈക്കോടതിയെ സമീപിച്ചു. കഴിഞ്ഞ ദിവസം ഇഡിയും ഇതേ ആവശ്യവുമായി ഹൈക്കോടതിയിൽ ഹർജി നൽകിയിരുന്നു. കേസിൽ പ്രത്യേക പ്രോസിക്യൂട്ടറെ നിയമിക്കാനും തീരുമാനമായി.

പ്രോസിക്യൂട്ടറുടെ നിലപാടിനെ തുടർന്നാണ് ഒൻപതാം പ്രതിക്ക് ജാമ്യം ലഭിച്ചതെന്ന വിവാദം ഉയർന്നിരുന്നു. ഇതിന് പിന്നാലെ മ്യൂസിയം എസ്‌എച്ച്ഒയും ഡയറക്ടർ ജനറൽ ഓഫ് പ്രോസിക്യൂഷനും തമ്മിൽ കൂടിക്കാഴ്ച നടത്തി. പ്രതിക്ക് ജാമ്യം നൽകരുതെന്ന് പൊലീസ് 13 കാരണങ്ങൾ ചൂണ്ടിക്കാട്ടിയിരുന്നെങ്കിലും, പ്രോസിക്യൂട്ടർ അത് കോടതിയിൽ ഫലപ്രദമായി അവതരിപ്പിച്ചില്ലെന്നും ജാമ്യം അനുവദിച്ചാലും പ്രശ്നമില്ലെന്ന നിലപാടാണ് സ്വീകരിച്ചതെന്നും എസ്‌എച്ച്ഒ ഡിജിപിയെ അറിയിച്ചു. ഇതിന്റെ അടിസ്ഥാനത്തിലാണ് ജില്ലാ കോടതി തെറ്റിദ്ധരിക്കപ്പെട്ട് ജാമ്യം അനുവദിച്ചതെന്നാണ് പൊലീസിന്റെ വിശദീകരണം.