വിജയ്‌യുടെ സേലം പൊതുയോഗത്തിന് അനുമതിയില്ല: അപേക്ഷ നിരസിച്ച് പോലീസ്

ചെന്നൈ: തമിഴകം വെട്രി കഴകം (ടി.വി.കെ.) അധ്യക്ഷൻ വിജയ് ഡിസംബർ 4-ന് സേലത്ത് നടത്താൻ നിശ്ചയിച്ചിരുന്ന പൊതുയോഗത്തിന് ജില്ലാ പോലീസ് മേധാവി അനുമതി നിഷേധിച്ചു. ഡിസംബർ 4-ന് കാർത്തിക ദീപം നടക്കുന്നതിനാൽ തിരുവണ്ണാമല ക്ഷേത്രത്തിലെ സുരക്ഷാ ജോലികൾക്കായി പോലീസുകാരെ നിയോഗിക്കേണ്ടതുണ്ടെന്ന് പോലീസ് വിശദീകരണം നൽകി.

ഡിസംബർ 6-നാണ് ബാബ്രി മസ്ജിദ് ദിനം. അതിനാൽ, ആ ദിവസങ്ങളുമായി അടുത്തുള്ള പൊതുയോഗങ്ങൾ അനുവദിക്കാനാകില്ലെന്നും എസ്.പി. അറിയിച്ചു. മറ്റൊരു ദിവസത്തേക്ക് അപേക്ഷ നൽകിയാൽ അനുകൂലമായ തീരുമാനമെടുക്കാമെന്ന് പോലീസ് ടി.വി.കെ. നേതൃത്വത്തെ അറിയിച്ചിട്ടുണ്ട്. ഇതിനെ തുടർന്ന് ഡിസംബർ രണ്ടാം വാരത്തേക്ക് പുതിയ അപേക്ഷ നൽകാൻ ടി.വി.കെ. ആലോചിക്കുന്നുണ്ട്. കരൂർ ദുരന്തത്തിന് ശേഷം ടി.വി.കെയുടെ ആദ്യ പൊതുയോഗമായിരുന്നു സേലത്ത് നിശ്ചയിച്ചിരുന്നത്.

സംസ്ഥാനത്ത് വിജയിയുടെ പര്യടനത്തിന് അനുമതി നൽകുക എന്ന രാഷ്ട്രീയ തീരുമാനമാണ് ഭരണകക്ഷിയായ ഡി.എം.കെ. പൊതുവെ സ്വീകരിച്ചിരിക്കുന്നത്. ഇതിന് പിന്നിലെ കണക്കുകൂട്ടലുകൾ ഇവയാണ്: വിജയിയെ എതിർക്കുന്നത് ഒരു സഹതാപ തരംഗം ഉണ്ടാക്കാൻ കാരണമായേക്കാം എന്ന് ഡി.എം.കെ. കരുതുന്നു. ഇത് ഒഴിവാക്കാനാണ് പര്യടനത്തിന് തടസ്സമുണ്ടാക്കാത്തത്. വിജയ് വീണ്ടും ജനങ്ങൾക്കിടയിലേക്ക് ഇറങ്ങുമ്പോൾ, സംസ്ഥാനത്തെ മുഖ്യ പ്രതിപക്ഷ പാർട്ടിയായ എ.ഐ.എ.ഡി.എം.കെ.യിലേക്ക് മാധ്യമ ശ്രദ്ധ പോകുന്നത് കുറയും എന്നും ഡി.എം.കെ. കണക്കുകൂട്ടുന്നു.