‘ദ കേരള സ്റ്റോറി 2’ റിലീസിന് ഹൈക്കോടതി സ്റ്റേ; നിർമ്മാതാക്കൾക്ക് കനത്ത തിരിച്ചടി

കൊച്ചി ‘ദ കേരള സ്റ്റോറി 2’ റിലീസിന് ഹൈക്കോടതി സ്റ്റേ. ഹർജി പരിഗണിച്ച ഹൈക്കോടതി സിനിമയ്ക്കെതിരെ കർശനമായ നിരീക്ഷണങ്ങളാണ് നടത്തിയത്. ചിത്രം പ്രഥമദൃഷ്ട്യാ മതസൗഹാർദ്ദത്തിന് ഭീഷണിയാണെന്ന് കോടതി വിലയിരുത്തി.

സിനിമയ്ക്ക് നൽകിയ സെൻസർ അനുമതി പുനഃപരിശോധിക്കണമെന്ന് സെൻസർ ബോർഡിനോട് കോടതി നിർദ്ദേശിച്ചു. ഹർജിയിൽ സെൻസർ ബോർഡ് ഉൾപ്പെടെയുള്ള കക്ഷികൾക്ക് കോടതി നോട്ടീസ് അയച്ചു. കണ്ണൂർ ചിറ്റാരിപ്പറമ്പ് സ്വദേശി ശ്രീദേവ് നമ്പൂതിരിയാണ് സിനിമയ്ക്കെതിരെ കോടതിയെ സമീപിച്ചത്. ഹർജിയിലെ പ്രധാന ഉന്നയിക്കലുകൾ ഇവയാണ്:

കേരളം തീവ്രവാദത്തിന്റെയും മതപരിവർത്തനത്തിന്റെയും നാടാണെന്ന് വരുത്തിത്തീർക്കാനാണ് സിനിമ ശ്രമിക്കുന്നത്. ഒരു പ്രദേശത്തെ ജനതയെ മുഴുവൻ തെറ്റായ രീതിയിൽ ചിത്രീകരിക്കുന്നത് ക്രമസമാധാന പ്രശ്നങ്ങൾക്ക് കാരണമാകും.

കേരളം വർഗീയതയുടെ കേന്ദ്രമാണെന്ന വ്യാജ പ്രചാരണമാണ് സിനിമ ലക്ഷ്യം വെക്കുന്നത്. അതേസമയം, രാജ്യത്ത് നിലനിൽക്കുന്ന യഥാർത്ഥ സാഹചര്യമാണ് സിനിമയിൽ പ്രതിപാദിക്കുന്നതെന്നാണ് സംവിധായകൻ കാമാഖ്യ നാരായൺ സിംഗിന്റെ അവകാശവാദം. സിനിമയുടെ ഭാവി ഇനി സെൻസർ ബോർഡിന്റെ പുനഃപരിശോധനയ്ക്കും കോടതിയുടെ അന്തിമ തീരുമാനത്തിനും വിധേയമായിരിക്കും.