സിനിമാ മേഖലയിൽ ജനുവരി 21ന് സൂചനാ പണിമുടക്ക്; തിയറ്ററുകൾ അടച്ചിടും, ചിത്രീകരണം നിർത്തിവയ്ക്കും

കൊച്ചി: വിവിധ ആവശ്യങ്ങൾ ഉന്നയിച്ച് ജനുവരി 21-ന് സംസ്ഥാനവ്യാപകമായി സൂചനാ പണിമുടക്ക് നടത്താൻ സിനിമാ സംഘടനകൾ തീരുമാനിച്ചു. ഫിലിം ചേംബർ, പ്രൊഡ്യൂസേഴ്സ് അസോസിയേഷൻ തുടങ്ങിയ പ്രമുഖ സംഘടനകളുടെ സംയുക്ത യോഗത്തിലാണ് ഈ തീരുമാനം എടുത്തത്. സിനിമയുമായി ബന്ധപ്പെട്ട എല്ലാ മേഖലകളും അന്നേദിവസം സ്തംഭിക്കും.

ജിഎസ്ടിക്ക് പുറമെ തദ്ദേശ സ്ഥാപനങ്ങൾ അധികമായി ഈടാക്കുന്ന വിനോദ നികുതി ഒഴിവാക്കണമെന്നതാണ് പ്രധാന ആവശ്യം. ഇരട്ട നികുതി സിനിമാ മേഖലയെ കടുത്ത പ്രതിസന്ധിയിലാക്കുന്നതായി സംഘടനകൾ ആരോപിക്കുന്നു. നിലവിൽ സിനിമാ വ്യവസായം നേരിടുന്ന കടുത്ത സാമ്പത്തിക പ്രതിസന്ധി മറികടക്കാൻ സർക്കാർ അടിയന്തരമായി ഇടപെടണമെന്ന് സംഘടനകൾ ആവശ്യപ്പെട്ടു.

‍ജനുവരി 21-ന് കേരളത്തിലെ തിയറ്ററുകൾ പൂർണ്ണമായും അടച്ചിടും. കൂടാതെ സിനിമകളുടെ ഷൂട്ടിംഗ്, പോസ്റ്റ് പ്രൊഡക്ഷൻ ജോലികൾ എന്നിവയും നിർത്തിവയ്ക്കും. സർക്കാർ തങ്ങളുടെ ആവശ്യങ്ങൾ പരിഗണിച്ചില്ലെങ്കിൽ വരും ദിവസങ്ങളിൽ കൂടുതൽ ശക്തമായ സമരപരിപാടികളിലേക്ക് നീങ്ങാനാണ് സംഘടനകളുടെ തീരുമാനം.