കുട്ടികളിൽ ഷിഗെല്ല ബാധ വർധിക്കുമോ? അറിയാം രോഗത്തെക്കുറിച്ച്

കോഴിക്കോട് ജില്ലയിൽ ഷിഗെല്ല രോഗബാധയെ തുടർന്ന് നാലരവയസ്സുകാരി മരിക്കുകയും മറ്റ് കുട്ടികളിൽ രോഗം സ്ഥിരീകരിക്കുകയും ചെയ്തതോടെ സംസ്ഥാനത്ത് വീണ്ടും ആശങ്ക ഉയർന്നിരിക്കുകയാണ്. ഷിഗെല്ല എന്ന ബാക്ടീരിയ മൂലമുണ്ടാകുന്ന പകർച്ചവ്യാധിയാണ് ഷിഗെല്ലോസിസ്. മലിനമായ ഭക്ഷണത്തിലൂടെയും വെള്ളത്തിലൂടെയും രോഗം പകരാം. കുട്ടികളിലാണ് രോഗബാധ കൂടുതലായി കാണപ്പെടുന്നത്.

കടുത്ത വയറിളക്കം, വയറുവേദന, പനി, ഛർദി, ക്ഷീണം എന്നിവയാണ് പ്രധാന ലക്ഷണങ്ങൾ. ചിലരിൽ മലത്തിൽ രക്തത്തിന്റെ അംശവും കാണാം.

മലിനജലം കുടിക്കുന്നതിലൂടെയും ശുചിത്വമില്ലാത്ത ഭക്ഷണം കഴിക്കുന്നതിലൂടെയും കൈകൾ ശരിയായി കഴുകാത്തതിലൂടെയും രോഗബാധിതരുമായി അടുത്ത സമ്പർക്കത്തിലൂടെയും രോഗം പകരാം.

ഭക്ഷണത്തിന് മുമ്പും ശൗചാലയം ഉപയോഗിച്ചതിന് ശേഷവും കൈകൾ സോപ്പ് ഉപയോഗിച്ച് കഴുകുക, തിളപ്പിച്ചാറിയ വെള്ളം മാത്രം കുടിക്കുക, പഴങ്ങളും പച്ചക്കറികളും നന്നായി കഴുകി ഉപയോഗിക്കുക, വയറിളക്ക ലക്ഷണങ്ങൾ കണ്ടാൽ ഉടൻ ചികിത്സ തേടുക എന്നിവയാണ് പ്രധാന പ്രതിരോധ മാർഗങ്ങൾ.