നൗഗാം സ്ഫോടനം ഭീകരാക്രമണമല്ല; സംഭവിച്ചത് ഫോറൻസിക് പരിശോധനയ്ക്കിടെ: ഡിജിപി

ശ്രീനഗർ: ജമ്മു കശ്മീരിലെ നൗഗാം പോലീസ് സ്റ്റേഷനിലുണ്ടായ സ്ഫോടനം ഭീകരാക്രമണമല്ലെന്നും ഫോറൻസിക് പരിശോധനയുമായി ബന്ധപ്പെട്ട നടപടിക്രമങ്ങൾക്കിടെ അബദ്ധത്തിൽ സംഭവിച്ചതാണെന്നും ഡിജിപി നളിൻ പ്രഭാത് സ്ഥിരീകരിച്ചു. ഇതോടെ, സംഭവത്തിന് പിന്നിൽ ഭീകരവാദികളാണെന്ന അഭ്യൂഹങ്ങൾ കേന്ദ്ര ആഭ്യന്തര മന്ത്രാലയവും ജമ്മു കശ്മീർ പോലീസും തള്ളിക്കളഞ്ഞു.

സ്ഫോടനത്തിൽ ഉദ്യോഗസ്ഥരടക്കം ഒമ്പത് പേർ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തു. ഡൽഹി സ്ഫോടനക്കേസിലെ പ്രതികളിലൊരാളായ ഡോക്ടർ മുസമ്മിലിന്റെ ഫരീദാബാദിലെ വാടകവീട്ടിൽ നിന്ന് പിടിച്ചെടുത്ത സ്ഫോടക വസ്തുക്കൾ പോലീസ് സ്റ്റേഷനിൽ വെച്ച് പരിശോധിക്കുന്നതിനിടെയാണ് അപകടം സംഭവിച്ചത്.

സംഭവത്തിൽ ജീവൻ നഷ്ടപ്പെട്ട ഒമ്പത് പേർ വിവിധ വകുപ്പുകളിലെ ഉദ്യോഗസ്ഥരും ജീവനക്കാരുമാണ്. എസ്‌ഐഎ (SIA) ഉദ്യോഗസ്ഥൻ - 1, എഫ്എസ്എൽ (FSL) ടീം അംഗങ്ങൾ - 3, ക്രൈം സീൻ ഫോട്ടോഗ്രാഫർമാർ - 2, മജിസ്‌ട്രേറ്റ് ടീമിന്റെ ഭാഗമായ റവന്യൂ ഉദ്യോഗസ്ഥർ - 2, ടീമുമായി ബന്ധപ്പെട്ട തയ്യൽക്കാരൻ - 1.

കൂടാതെ, 32 പേർക്ക് പരിക്കേൽക്കുകയുമുണ്ടായി. പരിക്കേറ്റ 27 പോലീസ് ഉദ്യോഗസ്ഥരെയും രണ്ട് റവന്യൂ ഉദ്യോഗസ്ഥരെയും സമീപവാസികളായ മൂന്ന് സാധാരണക്കാരെയും ഉടൻ തന്നെ അടുത്തുള്ള ആശുപത്രിയിലേക്ക് മാറ്റി. വെള്ളിയാഴ്ച രാത്രി 11:20-ഓടെയാണ് സ്ഫോടനം നടന്നത്. സംഭവത്തെ തുടർന്ന് പോലീസ് സ്റ്റേഷനും സമീപത്തെ കെട്ടിടങ്ങൾക്കും കനത്ത നാശനഷ്ടങ്ങൾ സംഭവിച്ചിട്ടുണ്ടെന്നും അധികൃതർ അറിയിച്ചു.