"ടെഹ്റാനെ നടുക്കി ഇസ്രയേലിന്റെ തിരിച്ചടി; വ്യോമാക്രമണത്തെത്തുടർന്ന് വിമാന സർവീസുകൾ നിർത്തിവെച്ചു"
ടെഹ്റാന്: പശ്ചിമേഷ്യയെ വീണ്ടും യുദ്ധഭീതിയിലാഴ്ത്തി ഇറാനെതിരെ ശക്തമായ തിരിച്ചടിയുമായി ഇസ്രയേല്. ഇറാന് തലസ്ഥാനമായ ടെഹ്റാന് ഉള്പ്പെടെയുള്ള പ്രമുഖ നഗരങ്ങളിലാണ് ഇസ്രയേല് വ്യോമാക്രമണം നടത്തിയത്. ടെഹ്റാന് പുറമെ താബ്രിസ്, ഇസ്ഫഹന്, കരാജ് തുടങ്ങിയ മേഖലകളിലും ശക്തമായ സ്ഫോടനങ്ങള് ഉണ്ടായതായാണ് വിവരം. ടെഹ്റാനില് രണ്ടും ഇസ്ഫഹനില് മൂന്നും വന് സ്ഫോടനങ്ങള് നടന്നതായി ഇറാന്റെ ഔദ്യോഗിക വാര്ത്താ ഏജന്സിയായ 'ഇര്ന'യെ ഉദ്ധരിച്ച് അല്ജസീറ റിപ്പോര്ട്ട് ചെയ്തു. ആക്രമണത്തിനായി ഇസ്രയേല് ബാലിസ്റ്റിക് മിസൈലുകള് പ്രയോഗിച്ചതായി ഇസ്ലാമിക് റെവല്യൂഷണറി ഗാര്ഡ് കോര്പ്സ് (IRGC) സ്ഥിരീകരിച്ചിട്ടുണ്ട്.
എന്നാല്, ടെഹ്റാനിലെ ജനവാസ മേഖലകളെ ഇസ്രയേല് ലക്ഷ്യമിട്ടിട്ടില്ലെന്നും പടിഞ്ഞാറന് മേഖലയിലെ സൈനിക കേന്ദ്രങ്ങളിലാണ് ആക്രമണം നടന്നതെന്നും ഇറാനിയന് മാധ്യമങ്ങള് വ്യക്തമാക്കുന്നു. നിലവില് ആക്രമണത്തില് ആളപായമോ വലിയ തോതിലുള്ള നാശനഷ്ടങ്ങളോ റിപ്പോര്ട്ട് ചെയ്യപ്പെട്ടിട്ടില്ല. അതേസമയം, സുരക്ഷാ മുന്കരുതലുകളുടെ ഭാഗമായി ടെഹ്റാനിലെ പ്രധാന വിമാനത്താവളമായ ഇമാം ഖൊമെയ്നി അന്താരാഷ്ട്ര വിമാനത്താവളത്തില് നിന്നുള്ള സര്വീസുകള് അധികൃതര് താല്ക്കാലികമായി റദ്ദാക്കി. അടുത്ത അറിയിപ്പ് ഉണ്ടാകുന്നത് വരെ വിമാന സര്വീസുകള് പുനരാരംഭിക്കില്ലെന്നാണ് ലഭിക്കുന്ന വിവരം.
കഴിഞ്ഞ ഞായറാഴ്ച ഇസ്രയേലിന്റെ വടക്കന് മേഖല ലക്ഷ്യമാക്കി ഇറാന് നടത്തിയ ബാലിസ്റ്റിക് മിസൈലാക്രമണത്തിനുള്ള മറുപടിയാണ് ഇപ്പോഴുണ്ടായ ഇസ്രയേല് നടപടി. ഏപ്രിലിലെ വെടിനിര്ത്തലിന് ശേഷം ഇരുരാജ്യങ്ങളും തമ്മിലുണ്ടാകുന്ന ഏറ്റവും ശക്തമായ സൈനിക നീക്കമാണിത്. ലെബനന് തലസ്ഥാനമായ ബെയ്റൂത്തില് ഇസ്രയേല് നടത്തിയ ആക്രമണങ്ങള്ക്കുള്ള മുന്നറിയിപ്പെന്നോണമാണ് തങ്ങള് മിസൈല് വര്ഷിച്ചതെന്നായിരുന്നു ഇറാന്റെ വാദം. ഐക്യരാഷ്ട്രസഭയുടെ ആര്ട്ടിക്കിള് 51 പ്രകാരം സ്വയംരക്ഷയ്ക്കുള്ള അവകാശം വിനിയോഗിക്കുക മാത്രമാണ് ചെയ്തതെന്ന് ഇറാന് വിദേശകാര്യമന്ത്രാലയം വ്യക്തമാക്കിയിരുന്നു. തങ്ങള്ക്കോ ലെബനനോ എതിരെ ഇസ്രയേല് നീങ്ങിയാല് ശക്തമായി തിരിച്ചടിക്കുമെന്ന് ഐആര്ജിസിയും മുന്നറിയിപ്പ് നല്കിയിരുന്നു. ഇതിന് പിന്നാലെയാണ് കടുത്ത പ്രത്യാഘാതം നേരിടേണ്ടി വരുമെന്ന് പ്രഖ്യാപിച്ച് ഇസ്രയേല് ഡിഫന്സ് ഫോഴ്സ് ഇറാനിലേക്ക് മിസൈലുകള് തൊടുത്തുവിട്ടത്.
What's Your Reaction?
