26 ദിവസത്തെ നിരാഹാര സമരം അവസാനിപ്പിച്ച് സോനം വാങ്ചുക്; കേന്ദ്രമന്ത്രിമാരുടെ സന്ദർശനത്തിന് പിന്നാലെ തീരുമാനം

തിരുവനന്തപുരം: 26 ദിവസമായി തുടരുന്ന അനിശ്ചിതകാല നിരാഹാര സമരം സാമൂഹിക പ്രവർത്തകൻ സോനം വാങ്ചുക് അവസാനിപ്പിച്ചു. ഗുരുഗ്രാമിലെ മെദാന്ത ആശുപത്രിയിൽ ചികിത്സയിൽ കഴിയുന്നതിനിടെയാണ് വെള്ളിയാഴ്ച പുലർച്ചെ അദ്ദേഹം നിരാഹാരം അവസാനിപ്പിച്ചത്. കേന്ദ്രമന്ത്രിമാരായ ജെ.പി. നദ്ദയും ജിതേന്ദ്ര സിംഗും ആശുപത്രിയിലെത്തി കൂടിക്കാഴ്ച നടത്തിയതിന് പിന്നാലെയായിരുന്നു തീരുമാനം. ഇരുവരുടെയും സാന്നിധ്യത്തിൽ നാരങ്ങാനീര് കുടിച്ചാണ് വാങ്ചുക് ഉപവാസം അവസാനിപ്പിച്ചത്. ഭാര്യ ഗീതാഞ്ജലി ആങ്മോയും ചടങ്ങിൽ ഒപ്പമുണ്ടായിരുന്നു.

കേന്ദ്ര ആഭ്യന്തര മന്ത്രി അമിത് ഷായുമായി നടത്തിയ ചർച്ചകൾക്ക് ശേഷമാണ് ജെ.പി. നദ്ദയും ജിതേന്ദ്ര സിംഗും വാങ്ചുക്കിനെ സന്ദർശിച്ചതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. കൂടിക്കാഴ്ചയിൽ വിദ്യാഭ്യാസ മേഖലയിലെ നിലവിലെ സാഹചര്യങ്ങളും സമരവുമായി ബന്ധപ്പെട്ട ആവശ്യങ്ങളും ചർച്ചയായതായും സൂചനകളുണ്ട്.

നീറ്റ് ചോദ്യപേപ്പർ ചോർച്ച ഉൾപ്പെടെയുള്ള പരീക്ഷാ ക്രമക്കേടുകൾക്ക് ഉത്തരവാദികളെ നിയമത്തിന് മുന്നിൽ കൊണ്ടുവരണമെന്നും രാജ്യത്തെ വിദ്യാഭ്യാസ സംവിധാനത്തിൽ സമഗ്രമായ പരിഷ്കാരങ്ങൾ നടപ്പാക്കണമെന്നും ആവശ്യപ്പെട്ടാണ് ജൂൺ 28ന് വാങ്ചുക് അനിശ്ചിതകാല നിരാഹാര സമരം ആരംഭിച്ചത്. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്നും വിദ്യാഭ്യാസ രംഗത്ത് സുതാര്യത ഉറപ്പാക്കണമെന്നും ആവശ്യപ്പെട്ട് വിദ്യാർത്ഥി-യുവജന സംഘടനകൾ നടത്തിയ പ്രക്ഷോഭത്തിന് ഐക്യദാർഢ്യം പ്രഖ്യാപിച്ചായിരുന്നു അദ്ദേഹം സമരത്തിൽ പങ്കുചേർന്നത്.

വാങ്ചുക്കിന്റെ നിരാഹാര സമരം രാജ്യവ്യാപകമായി വലിയ ചർച്ചകൾക്ക് വഴിവെച്ചിരുന്നു. വിദ്യാഭ്യാസ മേഖലയിലെ പരിഷ്കാരങ്ങൾ ആവശ്യപ്പെട്ടുള്ള പ്രക്ഷോഭത്തിന്റെ ശ്രദ്ധേയ മുഖങ്ങളിലൊന്നായി അദ്ദേഹം മാറുകയും വിദ്യാർത്ഥികളുടെയും യുവജനങ്ങളുടെയും വ്യാപക പിന്തുണ സമരത്തിന് ലഭിക്കുകയും ചെയ്തു.