മുഖ്യമന്ത്രി വി.ഡി. സതീശനെതിരെ സിപിഐഎം; ദുരന്തനിവാരണത്തിൽ കൂടുതൽ ഇടപെടണമെന്ന് വിമർശനം

തിരുവനന്തപുരം: സംസ്ഥാനത്ത് തുടരുന്ന അതിരൂക്ഷമായ മഴയും ദുരന്തസാഹചര്യങ്ങളും കണക്കിലെടുത്ത് മുഖ്യമന്ത്രി വി.ഡി. സതീശൻ കൂടുതൽ സജീവമായി ഇടപെട്ട് സർക്കാർ സംവിധാനത്തെ ഏകോപിപ്പിക്കണമെന്നും ജനങ്ങൾക്ക് ആത്മവിശ്വാസം പകരണമെന്നും ആവശ്യപ്പെട്ട് സിപിഐഎം സംസ്ഥാന സെക്രട്ടേറിയറ്റ് രംഗത്തെത്തി.

ദുരന്തസാഹചര്യത്തിൽ ഏറ്റവും വലിയ ഉത്തരവാദിത്വം മുഖ്യമന്ത്രിക്കാണെന്നും, മാധ്യമങ്ങൾ ദുരന്തവുമായി ബന്ധപ്പെട്ട ചോദ്യങ്ങൾ ഉന്നയിച്ചപ്പോൾ 'ഓഫീസിൽ നിന്ന് വിശദീകരണം നൽകും' എന്ന സമീപനം സ്വീകരിച്ചത് നിരാശാജനകമാണെന്നും പ്രസ്താവനയിൽ വിമർശിക്കുന്നു. മുൻകാല പ്രളയസമയങ്ങളിൽ മുഖ്യമന്ത്രി മാധ്യമങ്ങളുമായി നിരന്തരം സംവദിച്ചതിലൂടെ ജനങ്ങൾക്ക് ആത്മവിശ്വാസവും ജാഗ്രതയും നൽകാൻ സാധിച്ചിരുന്നുവെന്നും സിപിഐഎം ചൂണ്ടിക്കാട്ടി.

സർക്കാർ വാടകയ്ക്ക് എടുത്ത ഹെലികോപ്റ്റർ സ്വകാര്യ ആവശ്യങ്ങൾക്ക് ഉപയോഗിച്ചുവെന്ന ആരോപണവും, ജനങ്ങൾ ദുരിതമനുഭവിക്കുമ്പോൾ മുഖ്യമന്ത്രി വിരുന്നിൽ പങ്കെടുത്തെന്ന വിവാദവും പൊതുസമൂഹത്തിൽ വിമർശനത്തിന് ഇടയാക്കിയിട്ടുണ്ടെന്നും പ്രസ്താവനയിൽ പറയുന്നു.

ദുരന്തനിവാരണ പ്രവർത്തനങ്ങൾക്കും അടിയന്തര ആവശ്യങ്ങൾക്കുമായി ഉപയോഗിക്കാനാണ് ഹെലികോപ്റ്റർ വാടകയ്ക്ക് എടുത്തതെന്നും, എൽഡിഎഫ് സർക്കാർ ഇത്തരം സൗകര്യങ്ങൾ ജനങ്ങളുടെ ആവശ്യങ്ങൾക്കാണ് മുൻഗണന നൽകി ഉപയോഗിച്ചതെന്നും സിപിഐഎം വ്യക്തമാക്കി.

ജനങ്ങളെ സഹായിക്കുന്ന പ്രവർത്തനങ്ങൾക്ക് പ്രതിപക്ഷത്തിന്റെ എല്ലാ പിന്തുണയും ഉണ്ടാകുമെന്നും, എൽഡിഎഫ് പ്രവർത്തകർ ഇതിനോടകം തന്നെ രക്ഷാപ്രവർത്തനങ്ങളിൽ സജീവമാണെന്നും പ്രസ്താവനയിൽ പറയുന്നു. ദുരന്തത്തെ ഒരുമിച്ച് നേരിടാൻ എല്ലാവരും കൈകോർക്കണമെന്ന് പ്രതിപക്ഷ നേതാവ് പിണറായി വിജയൻ ജനങ്ങളോട് അഭ്യർഥിച്ചതായും സിപിഐഎം അറിയിച്ചു.