ഇറാനെതിരായ സൈനിക നീക്കം അവസാനിപ്പിക്കാൻ ട്രംപ് തയ്യാറായേക്കും; ഹോർമുസ് കടലിടുക്ക് തുറക്കുന്നത് നീട്ടിവയ്ക്കാനും സന്നദ്ധത

വാഷിങ്ടൻ/ദുബായ്: പശ്ചിമേഷ്യയിൽ സംഘർഷം പുകയുന്നതിനിടെ, ഇറാനെതിരായ സൈനിക നീക്കങ്ങളിൽ അയവ് വരുത്താൻ അമേരിക്കൻ പ്രസിഡന്റ് ഡോണൾഡ് ട്രംപ് സന്നദ്ധത പ്രകടിപ്പിച്ചതായി റിപ്പോർട്ട്. എന്നാൽ ഇതേസമയത്തുതന്നെ ദുബായ് തീരത്ത് കുവൈത്ത് എണ്ണക്കപ്പലിന് നേരെ ആക്രമണമുണ്ടായത് മേഖലയിൽ പുതിയ ആശങ്കകൾക്ക് കാരണമായിട്ടുണ്ട്.

ഹോർമുസ് കടലിടുക്ക് അടഞ്ഞുകിടക്കുകയാണെങ്കിൽ പോലും ഇറാനെതിരായ സൈനിക നടപടികൾ അവസാനിപ്പിക്കാൻ തയ്യാറാണെന്ന് ട്രംപ് സഹായികളോട് പറഞ്ഞതായി 'വാൾ സ്ട്രീറ്റ് ജേണൽ' റിപ്പോർട്ട് ചെയ്തു. സങ്കീർണ്ണമായ നയതന്ത്ര നടപടികൾ ഒഴിവാക്കാൻ അദ്ദേഹം താല്പര്യം പ്രകടിപ്പിച്ചതായാണ് ഉദ്യോഗസ്ഥരെ ഉദ്ധരിച്ചുള്ള വിവരം.

ദുബായ് തുറമുഖത്ത് നങ്കൂരമിട്ടിരുന്ന ‘അൽ സാൽമി’ എന്ന ഭീമൻ എണ്ണക്കപ്പലിന് നേരെയാണ് ഇറാനിയൻ സൈന്യത്തിന്റെ ആക്രമണമുണ്ടായത്. കപ്പലിലെ 24 ജീവനക്കാരും സുരക്ഷിതരാണെന്നും തീ നിയന്ത്രണവിധേയമാക്കാനുള്ള ശ്രമങ്ങൾ തുടരുകയാണെന്നും ദുബായ് മീഡിയ ഓഫീസ് അറിയിച്ചു.

കപ്പലിൽ പൂർണ്ണമായും എണ്ണ നിറച്ചിരുന്നതിനാൽ കടലിൽ വലിയ തോതിൽ എണ്ണച്ചോർച്ചയുണ്ടാകാൻ സാധ്യതയുണ്ടെന്ന് കുവൈത്ത് പെട്രോളിയം കോർപ്പറേഷൻ മുന്നറിയിപ്പ് നൽകി. സൈനിക നീക്കത്തേക്കാൾ ഉപരിയായി നയതന്ത്ര ചർച്ചകൾക്ക് ട്രംപ് മുൻഗണന നൽകുന്നതായാണ് സൂചനകൾ. ദുബായ് പോലെ തിരക്കേറിയ തുറമുഖത്ത് എണ്ണക്കപ്പലിന് നേരെയുണ്ടായ ആക്രമണം ഗൾഫ് മേഖലയിലെ കപ്പൽ ഗതാഗതത്തിന് വൻ ഭീഷണിയുയർത്തുന്നു. എണ്ണച്ചോർച്ചയുണ്ടായാൽ അത് ദുബായ് തീരത്തെ പരിസ്ഥിതിക്കും വിനോദസഞ്ചാര മേഖലയ്ക്കും വലിയ തിരിച്ചടിയാകും.