കെനിയയില്‍ ചെറുവിമാനം തകര്‍ന്നുവീണ് നിരവധി യാത്രക്കാര്‍ക്ക് ദാരുണാന്ത്യം

നെയ്‌റോബി: കെനിയയില്‍ ചെറുവിമാനം തകര്‍ന്നുവീണ് നിരവധി യാത്രക്കാര്‍ക്ക് ദാരുണാന്ത്യം. ക്വാലെ കൗണ്ടിയിലെ ടിസിംബ ഗോലിനിയിൽ ഇന്ന് രാവിലെ പ്രാദേശിക സമയം 8:30ഓടെയാണ് ചെറുവിമാനം തകർന്ന് വീണത്. അപകടത്തിൽ 12 പേർ മരിച്ചതായാണ് പ്രാഥമിക റിപ്പോർട്ടുകൾ.

വിനോദസഞ്ചാരികളുമായി പോയ വിമാനമാണ് തകർന്നു വീണത്. വിനോദസഞ്ചാരകേന്ദ്രമായ ദിയാനിയിൽ നിന്ന് മറ്റൊരു വിനോദസഞ്ചാര കേന്ദ്രമായ കിച്വ ടെംബോയിലേക്ക് പറന്നുയർന്ന 5വൈ-സിസിഎ എന്ന വിമാനമാണ് അപകടത്തിൽപ്പെട്ടത്.

ദുരന്തത്തിന് പിന്നാലെ പോലീസും അടിയന്തര സേനാവിഭാഗങ്ങളും രക്ഷാപ്രവർത്തനം ആരംഭിച്ചു. വിമാനത്തിന് തീപിടിക്കുകയും അവശിഷ്ടങ്ങൾ ചിതറിക്കിടക്കുകയും ചെയ്യുന്നതിൻ്റെ ദൃശ്യങ്ങൾ പുറത്തുവന്നിട്ടുണ്ട്. അപകട കാരണം വ്യക്തമല്ലെങ്കിലും, മോശം ദൃശ്യപരതയും പ്രതികൂല കാലാവസ്ഥയും ആകാം ദുരന്തത്തിലേക്ക് നയിച്ചതെന്നാണ് പ്രാഥമിക നിഗമനം.