ആറ് വയസുകാരിയെ ബലാത്സംഗം ചെയ്ത് കൊലപ്പെടുത്തി അയൽവാസി

ദർഭംഗ: ബീഹാറിലെ ദർഭംഗ ജില്ലയിൽ ആറ് വയസ്സുള്ള പെൺകുട്ടിയെ 22 വയസ്സുള്ള അയൽക്കാരൻ ബലാത്സംഗം ചെയ്ത് കൊലപ്പെടുത്തി. 

പട്വ പൊഖാർ പ്രദേശത്താണ് സംഭവം. ശനിയാഴ്ച വൈകുന്നേരം മുതൽ പെൺകുട്ടിയെ കാണാതായിരുന്നു, വീട്ടുകാർ നിരന്തരം തിരച്ചിൽ നടത്തുകയായിരുന്നു. തെരുവ് നായ്ക്കൾ കുരയ്ക്കാൻ തുടങ്ങിയപ്പോൾ സംശയം തോന്നിയ വീട്ടുകാർ അന്വേഷിച്ചു. കുളത്തിന് സമീപം നിലത്ത് കിടക്കുന്ന രക്തത്തിൽ കുളിച്ച നിലയിൽ പെൺകുട്ടിയുടെ മൃതദേഹം കണ്ടെത്തുകയായിരുന്നു. ഉടൻ തന്നെ പോലീസിൽ വിവരം അറിയിച്ചു.

വിവരം ലഭിച്ചയുടൻ പോലീസ് സ്ഥലത്തെത്തി അന്വേഷണം ആരംഭിച്ചു. അന്വേഷണത്തിൽ, ആറ് മുതൽ എട്ട് വയസ്സ് വരെ പ്രായമുള്ള മൂന്ന് പെൺകുട്ടികൾ കുളത്തിന് സമീപം ഒരുമിച്ച് കളിക്കുകയായിരുന്നെന്ന് കണ്ടെത്തി. പ്രതി പെൺകുട്ടികളിൽ ഒരാളെ ഇരുട്ടിലേക്ക് കൊണ്ടുപോയി ബലാത്സംഗം ചെയ്ത് കൊലപ്പെടുത്തിയ ശേഷം ഓടി രക്ഷപ്പെട്ടു. മറ്റ് രണ്ട് പെൺകുട്ടികൾ രക്ഷപ്പെട്ടു.

പോലീസ് മറ്റ് രണ്ട് പെൺകുട്ടികളെ സിസിടിവി ദൃശ്യങ്ങൾ കാണിച്ചപ്പോൾ, കുറ്റകൃത്യം ചെയ്തത് വികാസ് മഹ്തോ ആണെന്ന് അവർ തിരിച്ചറിഞ്ഞു.

ഇതേത്തുടർന്ന്, വികാസിനെ വീട്ടിലെത്തി അറസ്റ്റ് ചെയ്തു, അവിടെ വെച്ച് വസ്ത്രത്തിൽ രക്തക്കറ കണ്ടെത്തി. ഇരയുടെ മൃതദേഹം പോസ്റ്റ്‌മോർട്ടം പരിശോധനയ്ക്ക് അയച്ചതായി സീനിയർ പോലീസ് സൂപ്രണ്ട് (എസ്‌എസ്‌പി) ജഗന്നാഥ് റെഡ്ഡി പറഞ്ഞു.