നവാൽനിയെ കൊലപ്പെടുത്തിയത് അപൂർവ്വമായ 'തവള വിഷം' ഉപയോഗിച്ച്; റഷ്യക്കെതിരെ സംയുക്ത ആരോപണവുമായി യൂറോപ്യൻ രാജ്യങ്ങൾ

ലണ്ടൻ: റഷ്യൻ പ്രതിപക്ഷ നേതാവ് അലക്‌സി നവാൽനിയുടെ മരണം ആസൂത്രിതമായ കൊലപാതകമാണെന്ന ആരോപണവുമായി അഞ്ച് യൂറോപ്യൻ രാജ്യങ്ങൾ രംഗത്ത്. തെക്കേ അമേരിക്കൻ വനങ്ങളിൽ കാണപ്പെടുന്ന വിഷത്തവളകളുടെ തൊലിയിൽ നിന്നുള്ള മാരകമായ 'എപ്പിബാറ്റിഡിൻ'  എന്ന വിഷം ഉപയോഗിച്ചാണ് അദ്ദേഹത്തെ വധിച്ചതെന്ന് യുകെ, ഫ്രാൻസ്, ജർമ്മനി, സ്വീഡൻ, നെതർലാൻഡ്‌സ് എന്നീ രാജ്യങ്ങൾ ശനിയാഴ്ച പുറത്തിറക്കിയ സംയുക്ത പ്രസ്താവനയിൽ അറിയിച്ചു.

നവാൽനിയുടെ ശരീരസാമ്പിളുകളിൽ നടത്തിയ വിദഗ്ധ പരിശോധനയിൽ 'എപ്പിബാറ്റിഡിൻ' എന്ന മാരക വിഷാംശം കണ്ടെത്തി. റഷ്യയിൽ സാധാരണയായി ലഭ്യമല്ലാത്ത ഈ വിഷം സമാഹരിക്കാനും പ്രയോഗിക്കാനും റഷ്യൻ ഭരണകൂടത്തിന് മാത്രമേ സാധിക്കൂ എന്ന് ഈ രാജ്യങ്ങൾ ആരോപിക്കുന്നു.

കെമിക്കൽ വെപ്പൺസ് കൺവെൻഷൻ ലംഘിച്ചതിന് റഷ്യയെ കെമിക്കൽ വെപ്പൺസ് നിരോധന സംഘടനയ്ക്ക് മുന്നിൽ രാജ്യങ്ങൾ റിപ്പോർട്ട് ചെയ്തു. നവാൽനിയെ പുടിൻ ഭരണകൂടം ഒരു ഭീഷണിയായി കണ്ടിരുന്നുവെന്നും രാഷ്ട്രീയ എതിരാളികളോടുള്ള ഭയമാണ് ഇത്തരം നിന്ദ്യമായ മാർഗ്ഗങ്ങൾ സ്വീകരിക്കാൻ അവരെ പ്രേരിപ്പിച്ചതെന്നും ബ്രിട്ടീഷ് വിദേശകാര്യ സെക്രട്ടറി യവെറ്റ് കൂപ്പർ പറഞ്ഞു. നവാൽനിയുടെ മരണത്തിന് ഉത്തരവാദി പുടിനാണെന്ന ഭാര്യ യൂലിയ നവാൽനിയുടെ ആരോപണങ്ങളെ ശരിവെക്കുന്നതാണ് പുതിയ കണ്ടെത്തലുകൾ.

വ്‌ളാദിമിർ പുതിന്റെ കടുത്ത വിമർശകനായിരുന്ന നവാൽനി 2024 ഫെബ്രുവരിയിൽ ആർട്ടിക് പീനൽ കോളനിയിൽ തടവിൽ കഴിയുന്നതിനിടെയാണ് മരിച്ചത്. അഴിമതിക്കെതിരായ പോരാട്ടത്തിന് 19 വർഷത്തെ തടവുശിക്ഷ അനുഭവിക്കുകയായിരുന്നു അദ്ദേഹം. 2020-ൽ നവാൽനിയെ നോവിചോക്ക് എന്ന നാഡിവിഷം ഉപയോഗിച്ച് വധിക്കാൻ ശ്രമിച്ചിരുന്നു. ജർമ്മനിയിൽ ചികിത്സ തേടിയ അദ്ദേഹം തിരികെ റഷ്യയിലെത്തിയ ഉടൻ അറസ്റ്റ് ചെയ്യപ്പെടുകയായിരുന്നു. റഷ്യൻ ഉദ്യോഗസ്ഥർ ഈ പുതിയ ആരോപണങ്ങളും നിഷേധിച്ചിട്ടുണ്ടെങ്കിലും, അന്താരാഷ്ട്ര തലത്തിൽ റഷ്യക്കെതിരെയുള്ള സമ്മർദ്ദം ശക്തമാക്കാൻ ഈ റിപ്പോർട്ട് കാരണമാകും.