കോട്ടയത്ത് ആവേശം വിതറി രാഹുൽ ഗാന്ധി; യു.ഡി.എഫ് വന്നാൽ റബർ താങ്ങുവില 250 രൂപയാക്കും; ഉമ്മൻചാണ്ടിയെ അനുസ്മരിച്ച് പുതുപ്പള്ളിയിൽ പ്രസംഗം

കോട്ടയം: കേരളത്തിലെ നിയമസഭാ തിരഞ്ഞെടുപ്പ് പ്രചാരണത്തിന് ആവേശമേകി രാഹുൽ ഗാന്ധി കോട്ടയത്ത്. അന്തരിച്ച മുൻ മുഖ്യമന്ത്രി ഉമ്മൻചാണ്ടിയോടുള്ള ആദരസൂചകമായി പുതുപ്പള്ളിയിൽ നിന്നാണ് അദ്ദേഹം പ്രസംഗം ആരംഭിച്ചത്. റബർ കർഷകർക്കായി നിർണ്ണായക പ്രഖ്യാപനങ്ങൾ നടത്തിയ രാഹുൽ, സംസ്ഥാന-കേന്ദ്ര സർക്കാരുകളെ ഒരുപോലെ കടന്നാക്രമിച്ചു.

ഭാരത് ജോഡോ യാത്രയിൽ ഉമ്മൻചാണ്ടി നൽകിയ പിന്തുണയെ സ്മരിച്ച രാഹുൽ, റബർ കർഷകരുടെ ദുരവസ്ഥയ്ക്ക് പരിഹാരം കാണാൻ യുഡിഎഫ് അധികാരത്തിൽ വരുമെന്ന് ഉറപ്പുനൽകി. അധികാരമേറ്റാലുടൻ ആദ്യ മന്ത്രിസഭായോഗത്തിൽ തന്നെ റബർ വില 250 രൂപയായി നിശ്ചയിക്കുമെന്നും ഇത് ഘട്ടംഘട്ടമായി 300 രൂപയിലേക്ക് ഉയർത്തുമെന്നും അദ്ദേഹം വാഗ്ദാനം ചെയ്തു.

മോദി സർക്കാരിന്റെ വിദേശനയങ്ങളെയും അദാനി ബന്ധത്തെയും രാഹുൽ രൂക്ഷമായി വിമർശിച്ചു. അമേരിക്കൻ താല്പര്യങ്ങൾക്കായി ഇന്ത്യൻ കർഷകരെ മോദി ഒറ്റിക്കൊടുത്തുവെന്നും ട്രംപിന്റെ അനുമതിയില്ലാതെ ഇന്ധനം വാങ്ങാൻ പോലും കഴിയാത്ത അവസ്ഥ നാണക്കേടാണെന്നും അദ്ദേഹം പരിഹസിച്ചു.

കേരളാ മുഖ്യമന്ത്രി പിണറായി വിജയനെ മോദി സംരക്ഷിക്കുകയാണെന്ന് രാഹുൽ ആരോപിച്ചു. സ്വർണ്ണക്കടത്ത് ഉൾപ്പെടെയുള്ള വിഷയങ്ങളിൽ കേന്ദ്ര ഏജൻസികൾ മുഖ്യമന്ത്രിയെയും മക്കളെയും ചോദ്യം ചെയ്യാത്തത് ബിജെപിയും എൽഡിഎഫും തമ്മിലുള്ള ഒത്തുകളിയാണെന്ന് അദ്ദേഹം പറഞ്ഞു.

കേരളത്തിൽ ഒരു വനിതാ മുഖ്യമന്ത്രി വരുന്നത് കാണാൻ താൻ ആഗ്രഹിക്കുന്നുണ്ടെന്നും സ്ത്രീകളെ മുന്നിരയിലേക്ക് കൊണ്ടുവരികയാണ് കോൺഗ്രസ് ലക്ഷ്യമെന്നും അദ്ദേഹം പ്രഖ്യാപിച്ചു. യുഡിഎഫ് അധികാരത്തിൽ വന്നാൽ കൈക്കൊള്ളുന്ന ആദ്യ തീരുമാനം റബർ താങ്ങുവില വർദ്ധിപ്പിക്കുക എന്നതായിരിക്കും. നിലവിലെ താങ്ങുവില 250 രൂപയാക്കി നിശ്ചയിക്കും. കർഷകരുടെ സുരക്ഷ ഉറപ്പാക്കി വില 300 രൂപയിലേക്ക് ഉയർത്തും.