കേരളത്തില് സമഗ്ര വോട്ടര് പട്ടിക പരിഷ്കരണം നീട്ടണം; സംസ്ഥാന തെരഞ്ഞെടുപ്പ് കമ്മീഷന്
സംസ്ഥാനത്തെ തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രഖ്യാപനം ഉടന് നടക്കും
തിരുവനന്തപുരം: കേരളത്തില് സമഗ്ര വോട്ടര് പട്ടിക പരിഷ്കരണം നീട്ടണമെന്ന് സംസ്ഥാന തെരഞ്ഞെടുപ്പ് കമ്മീഷന്. തദ്ദേശ തെരഞ്ഞെടുപ്പ് പ്രഖ്യാപിക്കാനിരിക്കുന്നതിന്റെ പശ്ചാത്തലത്തിലാണ് ഈ ആവശ്യം. എസ്ഐആറുമായി ബന്ധപ്പെട്ട് സംസ്ഥാന മുഖ്യ തെരഞ്ഞെടുപ്പ് ഓഫീസറും സംസ്ഥാന തെരഞ്ഞെടുപ്പ് കമ്മീഷനും തമ്മിൽ ഇന്ന് ചർച്ച നടത്തും.
തദ്ദേശ തെരഞ്ഞെടുപ്പിന്റെ പശ്ചാത്തലത്തില് തീവ്ര വോട്ടര് പട്ടിക പരിഷ്കരണം നീട്ടിവയ്ക്കണമെന്ന് വിവിധ രാഷ്ട്രീയ പാര്ട്ടികള് ആവശ്യപ്പെട്ടിരുന്നു. വോട്ടര് പട്ടിക പരിഷ്കരണത്തിനെതിരെ കേരള നിയമസഭയിൽ പ്രമേയം കൊണ്ടുവരാൻ തീരുമാനിച്ചിട്ടുണ്ട്.
എസ്ഐആറിന് മുന്നോടിയായി മുഖ്യ തെരഞ്ഞെടുപ്പ് ഓഫിസര് ഡോ. യു ആര് രത്തന് ഖേല്ക്കര് വിളിച്ചുചേര്ത്ത രാഷ്ട്രീയ പാര്ട്ടി പ്രതിനിധികളുടെ യോഗത്തിലായിരുന്നു എല്ഡിഎഫ്, യുഡിഎഫ് പ്രതിനിധികള് എതിര്പ്പുയര്ത്തിയത്. എന്നാൽ ക്രമക്കേടുകൾ ഒഴിവാക്കാൻ പരിഷ്കരണം അനിവാര്യമെന്ന നിലപാടാണ് ബിജെപി പ്രതിനിധി യോഗത്തിലെടുത്തത്.
അതേസമയം സംസ്ഥാനത്തെ തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രഖ്യാപനം ഉടന് നടക്കും. ഡിസംബര് 20ന് മുമ്പ് തെരഞ്ഞെടുപ്പ് പൂര്ത്തിയാക്കാനാണ് തെരഞ്ഞെടുപ്പ് കമ്മീഷന് ആലോചിക്കുന്നത്. നവംബര്-ഡിസംബര് മാസങ്ങളിലാണ് തെരഞ്ഞെടുപ്പ് നടക്കുക. ഇതിന്റെ ഭാഗമായുള്ള മുന്നൊരുക്കങ്ങള് കമ്മീഷന് പൂര്ത്തിയാക്കി.
What's Your Reaction?
