നീറ്റ് പരീക്ഷാ ക്രമക്കേടിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനെതിരെ പ്രതിഷേധം ശക്തമാക്കാൻ കോൺഗ്രസ് തീരുമാനം.

ന്യൂഡൽഹി: നീറ്റ് പരീക്ഷാ ക്രമക്കേട് രാജ്യവ്യാപകമായി വലിയ വിവാദമായി തുടരുന്ന പശ്ചാത്തലത്തിൽ, കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനെതിരെ സമരം ശക്തമാക്കാൻ കോൺഗ്രസ്. ഇതിന്റെ ഭാഗമായി ഇന്ന് ഡൽഹിയിൽ യൂത്ത് കോൺഗ്രസ്, എൻഎസ്‌യുഐ എന്നീ സംഘടനകളുടെ നേതൃത്വത്തിൽ വൻ പ്രതിഷേധ പരിപാടികൾ അരങ്ങേറും. വിദ്യാഭ്യാസ മന്ത്രിയുടെ രാജിക്ക് പുറമെ, നാഷണൽ ടെസ്റ്റിങ് ഏജൻസി (എൻടിഎ) മേധാവിയെ അടിയന്തരമായി പുറത്താക്കണമെന്നും പ്രതിഷേധക്കാർ ആവശ്യപ്പെടുന്നുണ്ട്.

അതിനിടെ, പരീക്ഷാ ക്രമക്കേടുകളുമായി ബന്ധപ്പെട്ട പ്രതിസന്ധികളെ തുടർന്ന് രാജസ്ഥാനിൽ വീണ്ടുമൊരു വിദ്യാർത്ഥി കൂടി ജീവനൊടുക്കിയത് സ്ഥിതിഗതികൾ കൂടുതൽ സങ്കീർണ്ണമാക്കിയിരിക്കുകയാണ്. സിക്കാറിൽ താമസിച്ചിരുന്ന ജുൻജുനു സ്വദേശി പ്രദീപ് മേഘ്വാളാണ് ആത്മഹത്യ ചെയ്തത്. പരീക്ഷ റദ്ദാക്കിയ നടപടി പ്രദീപിനെ കടുത്ത മാനസിക വിഷമത്തിലാക്കിയിരുന്നുവെന്ന് കുടുംബാംഗങ്ങൾ വ്യക്തമാക്കി. ഇതോടെ പരീക്ഷാ വിവാദങ്ങളുമായി ബന്ധപ്പെട്ട് രാജ്യത്ത് ജീവനൊടുക്കേണ്ടി വന്ന വിദ്യാർത്ഥികളുടെ എണ്ണം നാലായി ഉയർന്നു.