തിരുവനന്തപുരത്ത് രണ്ട് വാഹനാപകടങ്ങളിലായി നാല് യുവാക്കൾക്ക് ദാരുണാന്ത്യം

തിരുവനന്തപുരം: പുതുവർഷത്തിന്റെ ആദ്യദിനം പുലർച്ചെ തിരുവനന്തപുരം നഗരത്തിലുണ്ടായ രണ്ട് റോഡപകടങ്ങളിൽ നാല് യുവാക്കൾ കൊല്ലപ്പെട്ടു. ഉള്ളൂരിലും വേളിയിലുമാണ് ബൈക്കുകളിൽ കാറിടിച്ച് അപകടങ്ങൾ സംഭവിച്ചത്. ആക്കുളം ഭാഗത്ത് നിന്ന് വരികയായിരുന്ന ബൈക്കിൽ എതിർദിശയിൽ നിന്നെത്തിയ കാർ ഇടിക്കുകയായിരുന്നു. അഴീക്കോട് സ്വദേശികളായ മുഹമ്മദ് ഫവാസ് (23), മുഹമ്മദ് ഫൈസി (21) എന്നിവരാണ് ഈ അപകടത്തിൽ മരിച്ചത്. മുഹമ്മദ് ഫവാസ് കരകുളത്തെ മൊബൈൽ ഷോപ്പിലും ഫൈസി അഴീക്കോടിലെ ചിക്കൻ സ്റ്റാളിലും ജീവനക്കാരായിരുന്നു.

വേളി-ഓൾ സെയിന്റ്സ് റോഡ്: ഓൾ സെയിന്റ്സ് ഭാഗത്ത് നിന്ന് വേളിയിലേക്ക് പോയ ബൈക്കിൽ കാറിടിച്ചാണ് രണ്ടാമത്തെ അപകടമുണ്ടായത്. പൂന്തുറ മാണിക്യവിളാകം സ്വദേശി അബ്ബാസ് (20), പൂന്തുറ സ്വദേശി ശഫാത്ത് (26) എന്നിവരാണ് മരണപ്പെട്ടത്. വലിയതുറ പോലീസ് ഉടൻ തന്നെ ഇവരെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇരുവരുടെയും ഖബറടക്കം പൂന്തുറ പുത്തൻപള്ളി ഖബർസ്ഥാനിൽ നടന്നു.

രണ്ട് അപകടങ്ങളിലും കാറുകളുമായി കൂട്ടിയിടിച്ച ബൈക്ക് യാത്രികരാണ് മരണപ്പെട്ടത്. പോലീസ് കേസെടുത്ത് അന്വേഷണം ആരംഭിച്ചു. നഗരത്തിൽ തുടർച്ചയായുണ്ടാകുന്ന വാഹനാപകടങ്ങൾ വലിയ ആശങ്കയ്ക്ക് കാരണമായിട്ടുണ്ട്.