ശബരിമല സ്വർണക്കൊള്ള കേസ്: സമഗ്ര റിപ്പോർട്ട് സമർപ്പിക്കാൻ എസ്‌ഐടിക്ക് ജൂൺ 29 വരെ സമയം നൽകി ഹൈക്കോടതി

കൊച്ചി∙ ശബരിമല സ്വർണക്കൊള്ള കേസ് അന്വേഷിക്കുന്ന പ്രത്യേകാന്വേഷണ സംഘത്തിന് (SIT) സമഗ്ര റിപ്പോർട്ട് സമർപ്പിക്കാൻ ജൂൺ 29 വരെ സമയം അനുവദിച്ച് ഹൈക്കോടതി. 2025-ൽ ദ്വാരപാലക ശിൽപ്പങ്ങളിലെ സ്വർണപ്പാളികൾ നീക്കം ചെയ്ത് ചെന്നൈയിലേക്ക് കൊണ്ടുപോയ സംഭവവുമായി ബന്ധപ്പെട്ട അന്വേഷണം അവസാന ഘട്ടത്തിലാണെന്ന് എസ്‌ഐടി കോടതിയെ അറിയിച്ചു.

ഉദ്യോഗസ്ഥർ ഉൾപ്പെടെ ഉത്തരവാദികളായവരുടെ പങ്ക് വിശദീകരിക്കുന്ന സമഗ്ര റിപ്പോർട്ട് ജൂൺ 29നകം സമർപ്പിക്കുമെന്നും അന്വേഷണസംഘം കോടതിയിൽ വ്യക്തമാക്കി. ശബരിമല സ്വർണക്കൊള്ള കേസിലെ അന്തിമ റിപ്പോർട്ട് എപ്പോൾ സമർപ്പിക്കാനാകുമെന്ന് അറിയിക്കാനും കോടതി നിർദേശിച്ചു.

എസ്‌ഐടി സമർപ്പിച്ച പുരോഗതി റിപ്പോർട്ട് പരിഗണിച്ച കോടതി, അന്വേഷണം പുരോഗമിക്കുന്ന സാഹചര്യത്തിൽ സമഗ്ര റിപ്പോർട്ട് സമർപ്പിക്കാൻ അവസാനമായി ഒരു അവസരം കൂടി നൽകുന്നതായി വ്യക്തമാക്കി. എസ്‌ഐടി തലവൻ എസ്. ശശിധരൻ കോടതിയിൽ നേരിട്ട് ഹാജരായി അന്വേഷണ പുരോഗതി റിപ്പോർട്ട് സമർപ്പിച്ചു.

നാഷണൽ മെറ്റലർജിക്കൽ ലബോറട്ടറിയിൽ നിന്നുള്ള ശാസ്ത്രീയ പരിശോധനാ റിപ്പോർട്ട് ലഭിച്ചതിനെ തുടർന്ന്, 2025-ൽ ദ്വാരപാലക വിഗ്രഹങ്ങളിൽ സ്വർണം പൂശിയതുമായി ബന്ധപ്പെട്ട കാര്യങ്ങളിലേക്കാണ് അന്വേഷണം ഇപ്പോൾ കേന്ദ്രീകരിച്ചിരിക്കുന്നത്. കേസിലെ ക്രിമിനൽ ഗൂഢാലോചനയും അതിലേക്ക് നയിച്ച സാഹചര്യങ്ങളും അന്വേഷിച്ചുവരികയാണെന്നും എസ്‌ഐടി അറിയിച്ചു.

സംഭവകാലത്ത് ശബരിമലയിൽ ഉത്തരവാദിത്തപ്പെട്ട സ്ഥാനങ്ങളിൽ ഉണ്ടായിരുന്ന ദേവസ്വം ബോർഡ് ഉദ്യോഗസ്ഥരുടെ പങ്കും പ്രത്യേകമായി പരിശോധിക്കുന്നുണ്ട്. വിഗ്രഹങ്ങളും സ്വർണപ്പാളികളും ചെന്നൈയിലേക്ക് കൊണ്ടുപോകാൻ എടുത്ത തീരുമാനത്തിൽ ഇവർക്ക് നേരിട്ടോ അല്ലാതെയോ പങ്കുണ്ടോയെന്ന് കണ്ടെത്താനാണ് അന്വേഷണസംഘത്തിന്റെ ശ്രമം.

ആരോപണങ്ങളുടെ ഗൗരവം കണക്കിലെടുക്കുമ്പോൾ അന്വേഷണത്തിന് ഇതിനകം മതിയായ സമയം നൽകിയിട്ടുണ്ടെന്നും ഇനി നടപടികൾ അനിശ്ചിതമായി നീട്ടാൻ അനുവദിക്കില്ലെന്നും കോടതി വ്യക്തമാക്കി. കേസ് വീണ്ടും ജൂൺ 29-ന് പരിഗണിക്കും.