മുഖ്യ തിരഞ്ഞെടുപ്പ് കമ്മീഷണറെ നീക്കം ചെയ്യണം ;73 എംപിമാരുടെ ഒപ്പോടെ രാജ്യസഭയില്‍ വീണ്ടും നോട്ടീസ്

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പദവിയിൽ നിന്ന് നീക്കം ചെയ്യണമെന്ന് ആവശ്യപ്പെട്ട് പ്രതിപക്ഷ പാർട്ടികൾ രാജ്യസഭയിൽ പുതിയ നോട്ടീസ് സമർപ്പിച്ചു. മാതൃകാ പെരുമാറ്റച്ചട്ടം നടപ്പിലാക്കുന്നതിൽ കമ്മീഷണർ പക്ഷപാതം കാണിക്കുന്നുവെന്നും ഭരണഘടനാപരമായ ഉത്തരവാദിത്തങ്ങൾ നിറവേറ്റുന്നതിൽ പരാജയപ്പെട്ടുവെന്നുമാണ് പ്രധാന ആരോപണം. കോൺഗ്രസ്, ടി.എം.സി, ഡി.എം.കെ തുടങ്ങി വിവിധ പ്രതിപക്ഷ പാർട്ടികളിലെ 73 എം.പിമാർ നോട്ടീസിൽ ഒപ്പിട്ടിട്ടുണ്ട്. ചീഫ് ഇലക്ഷൻ കമ്മീഷണറെ നീക്കം ചെയ്യാനായി പാർലമെന്റിൽ ഇത്തരമൊരു നോട്ടീസ് നൽകുന്നത് ഇതാദ്യമായാണ്.

പശ്ചിമ ബംഗാൾ, തമിഴ്‌നാട് നിയമസഭാ തിരഞ്ഞെടുപ്പുകൾക്ക് മുന്നോടിയായി പ്രധാനമന്ത്രി നടത്തിയ പ്രസംഗങ്ങൾക്കെതിരെ നൽകിയ പരാതികളിൽ കമ്മീഷൻ നടപടിയെടുക്കുന്നില്ലെന്ന് പ്രതിപക്ഷം കുറ്റപ്പെടുത്തുന്നു. ഗ്യാനേഷ് കുമാറിനെതിരെയുള്ള നിഷ്‌ക്രിയത്വത്തെ 'ഭരണഘടനയ്ക്ക് മേലുള്ള കടന്നാക്രമണം' എന്നാണ് കോൺഗ്രസ് നേതാവ് ജയറാം രമേശ് വിശേഷിപ്പിച്ചത്. നേരത്തെ സമാനമായ നോട്ടീസുകൾ ലോക്‌സഭാ സ്പീക്കറും രാജ്യസഭാ ചെയർമാനും തള്ളിക്കളഞ്ഞിരുന്നു. ഒമ്പതോളം പ്രത്യേക കുറ്റാരോപണങ്ങൾ ചൂണ്ടിക്കാട്ടിയാണ് ഇത്തവണ പ്രതിപക്ഷം പ്രമേയ നോട്ടീസ് സമർപ്പിച്ചിരിക്കുന്നത്.