കൂട്ടബലാത്സംഗ ദൃശ്യങ്ങൾ പകർത്തി, കോളയിൽ മയക്കുമരുന്ന് കലർത്തി; കൊച്ചി മനുഷ്യക്കടത്ത് കേസിൽ സിന്ധുവിന്റെ ക്രൂരതകൾ പുറത്ത്, റിമാൻഡ് റിപ്പോർട്ട്!

കൊച്ചി: മോഡലിങ്ങിന്റെ മറവിൽ കൊച്ചിയിൽ നടന്ന വൻ മനുഷ്യക്കടത്ത്, സെക്‌സ് റാക്കറ്റ് കേസിൽ ഒന്നാം പ്രതിയായ സിന്ധുവിനെക്കുറിച്ചുള്ള ഞെട്ടിക്കുന്ന വിവരങ്ങൾ പുറത്ത്. അന്താരാഷ്ട്ര റാക്കറ്റിന്റെ പ്രധാന കണ്ണിയായ സിന്ധുവിന് വൻ ഗുണ്ടാ സംഘങ്ങളുമായി അടുത്ത ബന്ധമുണ്ടെന്ന് പോലീസ് കോടതിയിൽ സമർപ്പിച്ച റിമാൻഡ് റിപ്പോർട്ടിൽ വ്യക്തമാക്കുന്നു. കേസിൽ മുഖ്യപ്രതിയായ സിന്ധുവിനെ നിലവിൽ 14 ദിവസത്തേക്ക് കോടതി റിമാൻഡ് ചെയ്തിട്ടുണ്ട്. മുംബൈ വിമാനത്താവളത്തിൽ നിന്ന് ഡൽഹിയിലേക്ക് കടക്കാൻ ശ്രമിക്കുന്നതിനിടെയാണ് കഴിഞ്ഞ ദിവസം ഇവരെ പോലീസ് നാടകീയമായി കസ്റ്റഡിയിലെടുത്തത്.

റിമാൻഡ് റിപ്പോർട്ടിലെ ഞെട്ടിക്കുന്ന കണ്ടെത്തലുകൾ:

• ദൃശ്യങ്ങൾ പകർത്തി ഭർത്താവിന് അയച്ചു: ഇരയായ യുവതിയെ കൂട്ടബലാത്സംഗം ചെയ്തതിന്റെ ക്രൂരമായ ദൃശ്യങ്ങൾ മൊബൈൽ ഫോണിൽ പകർത്തിയത് സിന്ധുവാണെന്ന് റിപ്പോർട്ടിൽ പറയുന്നു.

• കോളയിൽ വെളുത്ത പൊടി കലർത്തി: പരാതിക്കാരിയായ യുവതിക്ക് കൊക്കകോളയിൽ അജ്ഞാതമായ വെളുത്ത പൊടി (മയക്കുമരുന്ന്) കലർത്തി നൽകി അബോധാവസ്ഥയിലാക്കുകയായിരുന്നു. തുടർന്ന് പകർത്തിയ ദൃശ്യങ്ങൾ ഈ യുവതിയുടെ ഭർത്താവിന്റെ ഫോണിലേക്ക് അയച്ചുകൊടുക്കുകയും ചെയ്തു.

• ചൂരൽ പ്രയോഗവും മർദ്ദനവും: കേസ് ഒതുക്കിതീർക്കാനും യുവതിയെ ഭീഷണിപ്പെടുത്താനുമായി രണ്ടാം പ്രതിയായ ഷംല ചൂരൽ ഉപയോഗിച്ച് യുവതിയെ ക്രൂരമായി മർദ്ദിച്ചതായും റിപ്പോർട്ടിലുണ്ട്.

  
  

• പണമിടപാട് തെളിവുകൾ: സിന്ധു കേറ്ററിങ്/സെക്‌സ് റാക്കറ്റിലെ മറ്റ് പ്രതികൾക്ക് വൻതോതിൽ പണം കൈമാറിയതിന്റെ കൃത്യമായ തെളിവുകൾ പോലീസിന് ലഭിച്ചിട്ടുണ്ട്.

വാട്സാപ്പ് ചാറ്റുകൾ പുറത്ത്; പെൺകുട്ടികൾക്ക് വിലയിട്ടു

അതിനിടെ, മുഖ്യപ്രതി സിന്ധുവിന്റേതെന്ന് കരുതുന്ന ചില വാട്സാപ്പ് ചാറ്റുകളുടെ സ്‌ക്രീൻഷോട്ടുകൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. കെണിയിൽ പെടുത്തുന്ന പെൺകുട്ടികളുടെ ചിത്രങ്ങൾ സിന്ധു നേരിട്ട് ഇടപാടുകാർക്ക് വാട്സാപ്പ് വഴി അയച്ചു നൽകിയിരുന്നതായി ഇതിൽ നിന്നും വ്യക്തമാകുന്നു. ചിത്രങ്ങൾ അയച്ചതിന് പിന്നാലെ വൻ തുകകൾ ആവശ്യപ്പെട്ടാണ് ഇവർ 'ഡീൽ' ഉറപ്പിച്ചിരുന്നത്. കേസിൽ നിലവിൽ വലിയ അഴിച്ചുപണിയാണ് നടക്കുന്നത് എന്നും ഇനിയും കൂടുതൽ രാഷ്ട്രീയ-ഗുണ്ടാ ബന്ധമുള്ള പ്രതികൾ വരും ദിവസങ്ങളിൽ പിടിയിലാകുമെന്നുമാണ് സൂചന.