വോട്ടര്‍പട്ടിക പുതുക്കുന്നതിനുള്ള അവസാനതീയതി ഓഗസ്റ്റ് 12 വരെ നീട്ടി; പേരുചേര്‍ക്കാന്‍ അപേക്ഷാ പ്രവാഹം
ഇന്നുവരെയായിരുന്നു വോട്ടര്‍പട്ടികയില്‍ പേര് ചേര്‍ക്കാനുള്ള അവസാന തിയതി
തിരുവനന്തപുരം: തദ്ദേശസ്ഥാപനങ്ങളിലേയ്ക്കുള്ള പൊതുതെരഞ്ഞെടുപ്പിനു മുന്നോടിയായി വോട്ടര്‍പട്ടിക പുതുക്കുന്നതിനുള്ള അവസാനതീയതി ഓഗസ്റ്റ് 12 വരെ നീട്ടിയതായി സംസ്ഥാന തെരഞ്ഞെടുപ്പ് കമ്മീഷണര്‍ എ.ഷാജഹാന്‍. ഇന്നുവരെയായിരുന്നു വോട്ടര്‍പട്ടികയില്‍ പേര് ചേര്‍ക്കാനുള്ള അവസാന തിയതി. എന്നാല്‍, പട്ടികയില്‍ പേര് ചേര്‍ക്കാനുള്ള സമയപരിധി നീട്ടി നല്‍കണമെന്ന് പ്രതിപക്ഷ കക്ഷികള്‍ ആവശ്യപ്പെട്ടിരുന്നു. ഈ സാഹചര്യത്തിലാണ് സമയപരിധി നീട്ടിയത്.
അതേസമയം, വോട്ടര്‍പട്ടികയില്‍ പേരുചേര്‍ക്കാനായി ഓണ്‍ലൈന്‍ വഴി നിരവധി അപേക്ഷകളാണ് കമ്മീഷന് ലഭിക്കുന്നത്. കഴിഞ്ഞ രണ്ടാഴ്ചക്കിടെ 19.21 ലക്ഷം അപേക്ഷകളാണ് ലഭിച്ചത്. രാഷ്ട്രീയ കക്ഷികള്‍ വ്യാപകമായി അര്‍ഹരായ യുവാക്കളെ കണ്ടെത്തി പട്ടികയില്‍ പേരുചേര്‍പ്പിക്കാന്‍ മത്സരിക്കുന്നുണ്ട്.
ഇവയില്‍ ഭൂരിഭാഗവും ഹിയറിങ് നടത്തിയിട്ടില്ല. ഹിയറിങ്ങിന് വിളിക്കുമ്പോള്‍ ദൂരെസ്ഥലത്ത് പഠിക്കുകയോ ജോലി ചെയ്യുകയോ ചെയ്യുന്നവര്‍ക്ക് പകരം സംവിധാനമുണ്ട്. ഇവര്‍ക്ക് വേണ്ടി രക്തബന്ധമുള്ള ബന്ധുക്കള്‍ തിരിച്ചറിയല്‍ രേഖകള്‍ ഇലക്ടറല്‍ രജിസ്‌ട്രേഷന്‍ ഓഫീസറായ തദ്ദേശ സ്ഥാപന സെക്രട്ടറിക്ക് മുന്നില്‍ ഹാജരാകണം. അല്ലെങ്കില്‍ ഹിയറിങ്ങിന് നേരിട്ട് ഹാജരാകാന്‍ ഒരവസരം കൂടി അപേക്ഷകര്‍ക്ക് നല്‍കുന്നതാണ്.
What's Your Reaction?
