ഫ്ലെക്സ് വിവാദം: സിസിടിവി കെണിയിലായി സിപിഎം പ്രവർത്തകൻ; കോൺഗ്രസിൽ കുഴപ്പമുണ്ടാക്കാൻ ശ്രമിച്ചെന്ന് കുറ്റസമ്മതം

തൃശൂർ വാടാനപ്പള്ളിയിൽ കോൺഗ്രസ് നേതാവ് കെ.സി. വേണുഗോപാലിന്റെ പേരിൽ ഫ്ലെക്സ് ബോർഡ് സ്ഥാപിച്ച് പാർട്ടിയിൽ വിള്ളലുണ്ടാക്കാൻ ശ്രമിച്ച സിപിഎം പ്രവർത്തകൻ ഒടുവിൽ കുടുങ്ങി. 'കെ.സി നയിക്കട്ടെ' എന്നെഴുതിയ ബോർഡ് പഞ്ചായത്ത് ഓഫീസിന് മുന്നിൽ സ്ഥാപിച്ച അരവശേരി മുഹമ്മദ് എന്ന സിപിഎം പ്രവർത്തകന്റെ വാട്സാപ്പ് സന്ദേശമാണ് ഇപ്പോൾ കോൺഗ്രസ് പുറത്തുവിട്ടിരിക്കുന്നത്. സിസിടിവി ക്യാമറകൾ പ്രവർത്തനരഹിതമാണെന്ന് കരുതിയാണ് ബോർഡ് സ്ഥാപിച്ചതെന്നും പുതിയവ സ്ഥാപിച്ചത് അറിഞ്ഞില്ലെന്നും മുഹമ്മദ് സന്ദേശത്തിൽ സമ്മതിക്കുന്നുണ്ട്.

'സേവ് കോൺഗ്രസ്' എന്ന പേരിലായിരുന്നു കഴിഞ്ഞ രാത്രി ഫ്ലെക്സ് പ്രത്യക്ഷപ്പെട്ടത്. ഇതിന്റെ ചിത്രം ഉടൻ തന്നെ സോഷ്യൽ മീഡിയയിൽ പ്രചരിക്കുകയും ചെയ്തു. എന്നാൽ ബോർഡ് സ്ഥാപിക്കുന്ന ദൃശ്യങ്ങൾ സിസിടിവിയിൽ വ്യക്തമായി പതിഞ്ഞതോടെ കള്ളക്കളി പൊളിഞ്ഞു. സംഭവത്തിന് പിന്നിൽ സിപിഎമ്മിന്റെ ഗൂഢാലോചനയാണെന്ന് ആരോപിച്ച യുഡിഎഫ് മണ്ഡലം കമ്മിറ്റി പൊലീസിൽ പരാതി നൽകുകയും പ്രതിഷേധ പ്രകടനം നടത്തുകയും ചെയ്തു. സ്വന്തം പാർട്ടിയിലെ പ്രശ്നങ്ങൾ മറച്ചുവെക്കാൻ കോൺഗ്രസിൽ വിഭാഗീയതയുണ്ടെന്ന് വരുത്തിത്തീർക്കാനുള്ള ആസൂത്രിത നീക്കമാണിതെന്നാണ് യുഡിഎഫ് നേതൃത്വം പറയുന്നത്.