സംസ്ഥാനത്ത് വീണ്ടും അമീബിക് മസ്തിഷ്‌കജ്വരം

കൊച്ചി: സംസ്ഥാനത്ത് വീണ്ടും അമീബിക് മസ്തിഷ്‌കജ്വരം സ്ഥിരീകരിച്ചു. കൊച്ചി ഇടപ്പള്ളിയിൽ ജോലി ചെയ്യുകയായിരുന്ന ലക്ഷദ്വീപ് സ്വദേശിക്കാണ് രോഗബാധ കണ്ടെത്തിയത്. നിലവിൽ ഇദ്ദേഹം കൊച്ചിയിലെ ഒരു സ്വകാര്യ ആശുപത്രിയിൽ ചികിത്സയിലാണ്. രോഗിയുടെ ആരോഗ്യനില തൃപ്തികരമാണെന്ന് ജില്ലാ മെഡിക്കൽ ഓഫീസർ അറിയിച്ചു.

സംസ്ഥാനത്ത് അമീബിക് മസ്തിഷ്‌കജ്വരം സംബന്ധിച്ച ആശങ്ക വർദ്ധിപ്പിക്കുന്ന റിപ്പോർട്ടുകളാണ് ഒക്ടോബർ മാസത്തിൽ പുറത്തുവന്നത്. കഴിഞ്ഞ ദിവസം കൊല്ലം പാലത്തറ സ്വദേശിയായ 65-കാരൻ രോഗം ബാധിച്ച് ചികിത്സയിലിരിക്കെ മരിച്ചിരുന്നു. ഇതോടെ, ഒക്ടോബർ മാസത്തിൽ മാത്രം രോഗം മൂലം മരിച്ചവരുടെ എണ്ണം 12 ആയി ഉയർന്നു. ഒക്ടോബറിൽ 65 പേർക്കാണ് രോഗം റിപ്പോർട്ട് ചെയ്തത്. ഇതുവരെയുള്ളതിൽ ഏറ്റവും ഉയർന്ന പ്രതിമാസ രോഗബാധ കണക്കാണിത്.