നെടുമങ്ങാട് ജില്ലാ ആശുപത്രിയിൽ ചികിത്സാപ്പിഴവ്; പ്രസവ ശസ്ത്രക്രിയയ്ക്ക് പിന്നാലെ 23-കാരി ദുരിതത്തിൽ, ഡോക്ടർക്കെതിരെ കേസ്

നെടുമങ്ങാട് ജില്ലാ ആശുപത്രിയിൽ സിസേറിയന് വിധേയയായ യുവതി ചികിത്സാപ്പിഴവിനെത്തുടർന്ന് മാസങ്ങളായി കടുത്ത ശാരീരിക വേദനയിലും ദുരിതത്തിലുമാണ്. ശസ്ത്രക്രിയയ്ക്ക് പിന്നാലെ ജനനേന്ദ്രിയത്തിലൂടെ വിസർജ്യം പുറത്തുപോകുന്ന അവസ്ഥയുണ്ടായതാണ് യുവതിയെ പ്രതിസന്ധിയിലാക്കിയത്. നിലവിൽ ഈ വിഷയത്തിൽ പോലീസ് കേസെടുക്കുകയും ആരോഗ്യവകുപ്പ് അന്വേഷണം ആരംഭിക്കുകയും ചെയ്തിട്ടുണ്ട്.

ജൂൺ 19 ന് നെടുമങ്ങാട് ജില്ലാ ആശുപത്രിയിൽ യുവതി സിസേറിയന് വിധേയയായി. മൂന്ന് ദിവസത്തിന് ശേഷം തുന്നലിട്ട ഭാഗത്തുകൂടി വിസർജ്യം പുറത്തുപോകുന്നത് ശ്രദ്ധയിൽപ്പെട്ടു. മുറിവ് ഉണങ്ങുമ്പോൾ മാറുമെന്ന് അറിയിച്ചെങ്കിലും പത്താം ദിവസം ഡിസ്ചാർജ് ചെയ്തിട്ടും സ്ഥിതി മാറിയില്ല. കടുത്ത വേദനയെത്തുടർന്ന് വീണ്ടും ആശുപത്രിയിൽ എത്തിയെങ്കിലും ഫലമുണ്ടായില്ല.

ജൂലൈയിൽ മെഡിക്കൽ കോളേജ് ആശുപത്രിയിലേക്ക് മാറ്റി. വിസർജ്യം പുറത്തെടുക്കാൻ വയറിന് പുറത്ത് 'സ്റ്റോമ ബാഗ്' ഘടിപ്പിച്ചു. ഒക്ടോബറിൽ പ്ലാസ്റ്റിക് സർജറി നടത്തിയെങ്കിലും പരാജയപ്പെട്ടു. തുടർന്ന് നവംബറിൽ കുടലിന്റെ കൂടുതൽ ഭാഗം പുറത്തുവെച്ച് വീണ്ടും ശസ്ത്രക്രിയ നടത്തി.

വയറിന്റെ ഭാഗത്ത് പഴുപ്പ് ബാധിച്ചതിനെത്തുടർന്ന് യുവതി കടയ്ക്കലിലെ സ്വകാര്യ ആശുപത്രിയിൽ ചികിത്സ തേടി. അവിടെ വെച്ച് സ്റ്റോമ ബാഗിന്റെ സ്ഥാനം മാറ്റി ശസ്ത്രക്രിയ നടത്തി. ഇനിയും രണ്ട് ശസ്ത്രക്രിയകൾ കൂടി വേണമെന്നാണ് ഡോക്ടർമാർ അറിയിച്ചിട്ടുള്ളത്. ഏഴ് മാസം പ്രായമായ കുഞ്ഞിന് പാൽ നൽകാൻ പോലും കഴിയാത്ത വിധം അവശയായ യുവതിയും കുടുംബവും തുടർചികിത്സയ്ക്കുള്ള പണമില്ലാതെ വലയുകയാണ്.

യുവതിയുടെ പരാതിയെത്തുടർന്ന് നെടുമങ്ങാട് ജില്ലാ ആശുപത്രിയിലെ ഡോക്ടർക്കെതിരെ പോലീസ് കേസെടുത്തു. മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിൽ അഡീഷണൽ ഡി.എം.ഒ, ആർ.സി.എച്ച് ഓഫീസർ എന്നിവരടങ്ങുന്ന സംഘം ഇന്ന് ആശുപത്രിയിൽ അന്വേഷണം നടത്തും. ചികിത്സാ രേഖകളുമായി ഇന്ന് ഹാജരാകാൻ യുവതിക്ക് അധികൃതർ നിർദ്ദേശം നൽകിയിട്ടുണ്ട്. കൂടാതെ ഫെബ്രുവരി 6-ന് സൂപ്രണ്ടിന് മുന്നിൽ മൊഴി നൽകാനും ആവശ്യപ്പെട്ടിട്ടുണ്ട്.