നിരുത്തരവാദപരമായ പെരുമാറ്റം; ലാലു പ്രസാദ് യാദവിന്റെ മൂത്ത മകൻ തേജ് പ്രതാപ് യാദവിനെ ആർ.ജെ.ഡിയിൽ നിന്ന് പുറത്താക്കി

പട്ന: രാഷ്ട്രീയ ജനതാദൾ (ആർ.ജെ.ഡി) മേധാവി ലാലു പ്രസാദ് യാദവ് ഞായറാഴ്ച തന്റെ മൂത്ത മകൻ തേജ് പ്രതാപ് യാദവിനെ പാർട്ടിയിൽ നിന്ന് ആറ് വർഷത്തേക്ക് പുറത്താക്കുകയും കൂടാതെ തേജ് പ്രതാപുമായുള്ള എല്ലാ കുടുംബ ബന്ധങ്ങളും വിച്ഛേദിക്കുകയും ചെയ്തു.

ഉച്ചകഴിഞ്ഞ് എക്‌സിലെ ഒരു പോസ്റ്റിലൂടെയാണ് ലാലു ഇക്കാര്യം അറിയിച്ചത്.

"മൂത്ത മകന്റെ പ്രവർത്തനങ്ങൾ, പൊതു പെരുമാറ്റം, നിരുത്തരവാദപരമായ പെരുമാറ്റം എന്നിവ ഞങ്ങളുടെ കുടുംബ മൂല്യങ്ങൾക്കും പാരമ്പര്യങ്ങൾക്കും അനുസൃതമല്ല... ഞാൻ അവനെ പാർട്ടിയിൽ നിന്നും കുടുംബത്തിൽ നിന്നും പുറത്താക്കുന്നു. ഇനി മുതൽ, പാർട്ടിയിലും കുടുംബത്തിലും അവന് ഒരു തരത്തിലുള്ള പങ്കും ഉണ്ടായിരിക്കില്ല. ആറ് വർഷത്തേക്ക് അവനെ പാർട്ടിയിൽ നിന്ന് പുറത്താക്കുന്നു," ലാലു എക്‌സിലെ പോസ്റ്റിൽ പറഞ്ഞു.

ഒരു യുവതിയുമായി തനിക്ക് "ബന്ധമുണ്ടെന്ന്" തേജ് പ്രതാപ് ഫേസ്ബുക്ക് പോസ്റ്റിൽ പറഞ്ഞതിന് ഒരു ദിവസത്തിന് ശേഷമാണ് ഈ നീക്കം, എന്നാൽ പിന്നീട് സോഷ്യൽ മീഡിയ പ്ലാറ്റ്‌ഫോമിലെ തന്റെ അക്കൗണ്ട് ഹാക്ക് ചെയ്യപ്പെട്ടു എന്ന് തേജ് അവകാശപ്പെട്ടിരുന്നു.

"എന്റെ സോഷ്യൽ മീഡിയ പ്ലാറ്റ്‌ഫോം ഹാക്ക് ചെയ്യപ്പെട്ടു, എന്റെ ഫോട്ടോകൾ തെറ്റായി എഡിറ്റ് ചെയ്‌തു," വൈറലാകുകയും മാധ്യമങ്ങൾ ശ്രദ്ധിക്കുകയും ചെയ്ത പോസ്റ്റിനെ പരാമർശിച്ച് തേജ് എക്‌സിലെ ഒരു പോസ്റ്റിൽ പറഞ്ഞു.

പോസ്റ്റിൽ തേജ് പ്രതാപ് ഒരു സ്ത്രീയോടൊപ്പം കാണപ്പെട്ടു, "ഈ ചിത്രത്തിൽ കാണുന്നയാൾ അനുഷ്ക യാദവ് ആണ്. കഴിഞ്ഞ 12 വർഷമായി ഞങ്ങൾക്ക്‌ പരസ്പരം അറിയാം. ഞങ്ങൾ പ്രണയത്തിലാണ്, 12 വർഷമായി ബന്ധത്തിലുമാണ്" എന്ന അടിക്കുറിപ്പും ഉണ്ടായിരുന്നു.

ഈ പോസ്റ്റ് സോഷ്യൽ മീഡിയ ഉപയോക്താക്കളിൽ നിന്ന് വൻ വിമർശനങ്ങൾ ഏറ്റുവാങ്ങിയിരുന്നു.