പോലീസ് ഉന്നതതലത്തിൽ അഴിച്ചുപണി; എഡിജിപിയായി പി വിജയൻ, കോഴിക്കോട് സിറ്റി കമ്മീഷണറായി ഷൗക്കത്തലി

തിരുവനന്തപുരം: സംസ്ഥാന പൊലീസ് സേനയുടെ ഉന്നതതലത്തിൽ വൻ അഴിച്ചുപണിക്ക് സർക്കാർ ഉത്തരവിറക്കി.

 മുതിർന്ന ഐപിഎസ് ഉദ്യോഗസ്ഥനായ പി വിജയനെ നിയമ-ക്രമസമാധാന ചുമതലയുള്ള എഡിജിപിയായി നിയമിച്ചു.

ഇതോടെ എച്ച് വെങ്കടേഷിൽ നിന്ന് ആ ചുമതല പിൻവലിക്കപ്പെട്ടപ്പോൾ, അദ്ദേഹം ക്രൈംബ്രാഞ്ച് മേധാവി സ്ഥാനത്ത് തുടരും.

 എസ് ശ്രീജിത്തിന് ജയിൽ മേധാവിയുടെ ചുമതല നൽകിയതോടൊപ്പം ദിനേന്ദ്ര കശ്യപിനെ ഇന്റലിജൻസ് മേധാവിയായി നിയമിക്കുകയും ചെയ്തു.

സംസ്ഥാന പൊലീസിലെ വിവിധ സുപ്രധാന തസ്തികകളിലും വ്യാപക മാറ്റങ്ങളാണ് നടപ്പാക്കിയത്.

ബൽറാം കുമാർ ഉപാധ്യായ സായുധ പൊലീസ് ബറ്റാലിയൻ എഡിജിപിയായും അരുണ്‍ ബി കൃഷ്ണ തിരുവനന്തപുരം സിറ്റി പൊലീസ് കമ്മീഷണറായും ചുമതലയേൽക്കും. 

ആർ നിശാന്തിനിയെ ഇന്റലിജൻസ് ഐജിയായും ഹർഷിത അട്ടല്ലൂരിയെ പൊലീസ് ആസ്ഥാനത്തെ ഐജിയായും നിയമിച്ചു.

എ പി ഷൗക്കത്തലി കോഴിക്കോട് സിറ്റി പൊലീസ് കമ്മീഷണറായപ്പോൾ കെ കാർത്തിക് തൃശൂർ ഡിഐജിയായും യതീഷ് ചന്ദ്ര എറണാകുളം റേഞ്ച് ഡിഐജിയായും നിയമിതനായി.

 മെറിൻ ജോസഫിന് കോഴിക്കോട് റൂറൽ പൊലീസ് മേധാവിയുടെ ചുമതല ലഭിച്ചു.

 ബി വി വിജയ് ഭാരത് റെഡ്ഡിയാണ് പുതിയ കണ്ണൂർ സിറ്റി പൊലീസ് കമ്മീഷണർ.

ജില്ലാ പൊലീസ് മേധാവിമാരുടെ തലത്തിലും മാറ്റങ്ങൾ നടന്നു. സാബു മാത്യു കോട്ടയം എസ്പിയായും വിഷ്ണു പ്രദീപ് ടി കെ ആലപ്പുഴ എസ്പിയായും അബ്ദുൾ റാഷിദ് എ പാലക്കാട് എസ്പിയായും എസ് ദേവ മനോഹർ വയനാട് എസ്പിയായും നിധിൻ രാജ് കാസർകോട് എസ്പിയായും നിയമിതരായി.

ബി കൃഷ്ണകുമാർ റെയിൽവേ എസ്പിയായും പ്രശാന്തൻ കാണി ബി കെ തിരുവനന്തപുരം റൂറൽ ജില്ലാ പൊലീസ് മേധാവിയായും ഷാജി സുഗുണൻ കൊല്ലം റൂറൽ ജില്ലാ പൊലീസ് മേധാവിയായും ചുമതലയേൽക്കും.

മുഹമ്മദ് നദീമുദ്ദീൻ തൃശൂർ റൂറൽ എസ്പിയായും ഉമേഷ് ഗോയൽ കണ്ണൂർ റൂറൽ എസ്പിയായും ഡോ. നസീം എ ഇടുക്കി ജില്ലാ പൊലീസ് മേധാവിയായും നിയമിതനായി.

 മോഹന ചന്ദ്രന് കോഴിക്കോട്-വയനാട് ക്രൈംബ്രാഞ്ച് എസ്പിയുടെ ചുമതല നൽകിയപ്പോൾ അനുജ് പാലിവാൽ പൊലീസ് ആസ്ഥാനത്തെ എഐജിയായും ഫറാഷ് ടി എറണാകുളം കോസ്റ്റൽ പൊലീസിന്റെ എഐജിയായും നിയമിതനായി.

സി എസ് ഷാഹുൽ ഹമീദ് തിരുവനന്തപുരം ക്രൈംബ്രാഞ്ച് സെൻട്രൽ യൂണിറ്റ്-1 എസ്പിയായും ചുമതലയേൽക്കും.