വിറ്റാമിൻ ഡി ഗുളികകൾ ഡോക്ടറുടെ നിർദേശമില്ലാതെ കഴിക്കരുത്; കാത്തിരിക്കുന്നത് വലിയ ആരോഗ്യപ്രശ്നങ്ങൾ

ലോകമെമ്പാടും വിറ്റാമിൻ ഡിയുടെ അഭാവം റിപ്പോർട്ട് ചെയ്യപ്പെടുന്നതോടെ സപ്ലിമെന്റുകൾ ഉപയോഗിക്കുന്നവരുടെ എണ്ണത്തിൽ വലിയ വർധനവുണ്ടായിട്ടുണ്ട്. എന്നാൽ ഡോക്ടറുടെ നിർദ്ദേശമില്ലാതെ സ്വയം ചികിത്സ നടത്തുന്നവർക്കിടയിൽ 'വിറ്റാമിൻ ഡി ടോക്സിസിറ്റി' എന്ന അപകടകരമായ അവസ്ഥ വർധിച്ചുവരുന്നത് ആരോഗ്യവിദഗ്ധർക്കിടയിൽ ആശങ്കയുണ്ടാക്കുന്നു.

സൂര്യപ്രകാശത്തിലൂടെയോ ഭക്ഷണത്തിലൂടെയോ ശരീരത്തിന് ആവശ്യമായ വിറ്റാമിൻ ഡി ലഭിക്കാത്തവർ സപ്ലിമെന്റുകളെ അമിതമായി ആശ്രയിക്കുമ്പോഴാണ് ഈ അവസ്ഥയുണ്ടാകുന്നത്. കൊഴുപ്പിൽ അലിയുന്ന പോഷകമായതിനാൽ വിറ്റാമിൻ ഡി ശരീരത്തിൽ നിന്ന് വേഗത്തിൽ പുറന്തള്ളപ്പെടില്ല. ഇത് അളവിൽ കൂടുതൽ ശരീരത്തിലെത്തുന്നത് ഗുരുതരമായ പ്രത്യാഘാതങ്ങൾ ഉണ്ടാക്കും.

വിറ്റാമിൻ ഡി അധികമായാൽ രക്തത്തിൽ കാത്സ്യം കുമിഞ്ഞുകൂടാൻ (Hypercalcemia) കാരണമാകും. ഇത് വൃക്കയിൽ കല്ലുകൾ രൂപപ്പെടാനും വൃക്കയുടെ കോശങ്ങളിൽ കാത്സ്യം അടിഞ്ഞുകൂടി പ്രവർത്തനം തടസ്സപ്പെടാനും ഇടയാക്കും.

ഹൃദയം, ശ്വാസകോശം, രക്തക്കുഴലുകൾ തുടങ്ങിയ മൃദുവായ ടിഷ്യൂകളിൽ കാത്സ്യം അടിഞ്ഞുകൂടുന്നത് അവയുടെ പ്രവർത്തനത്തെ ബാധിക്കുകയും ഹൃദയരോഗങ്ങൾക്കും ശ്വാസകോശ തകരാറുകൾക്കും കാരണമാവുകയും ചെയ്യും. ദഹനപ്രശ്നങ്ങൾ: വയറുവേദന, വയറിളക്കം, വിശപ്പില്ലായ്മ എന്നിവ ഇതിന്റെ ലക്ഷണങ്ങളാണ്. ശരീരത്തിലെ കാത്സ്യവും ഫോസ്ഫറസും തമ്മിലുള്ള സന്തുലിതാവസ്ഥ തെറ്റുന്നത് എല്ലുകളെ ദുർബലമാക്കുന്ന 'ഹൈപ്പർഫോസ്ഫേറ്റീമിയ' എന്ന അവസ്ഥയിലേക്ക് നയിക്കാം.

അമിതമായ പേശിവേദന, വീക്കം, ക്ഷീണം എന്നിവയും വിറ്റാമിൻ ഡി അമിതമായതിന്റെ ലക്ഷണങ്ങളാകാം. സപ്ലിമെന്റുകൾ ആരംഭിക്കുന്നതിന് മുൻപ് രക്തപരിശോധനയിലൂടെ അളവ് കണ്ടെത്തുകയും ഡോക്ടറുടെ കൃത്യമായ നിർദ്ദേശം തേടുകയും ചെയ്യേണ്ടത് അത്യാവശ്യമാണ്.