50 ഇന്ത്യക്കാരെ കൂടി നാടുകടത്തി യു.എസ്.; കാലില്‍ ചങ്ങലയിട്ട് 25 മണിക്കൂറോളം വിമാനത്തില്‍ 

യുഎസിൽ അനധികൃത കുടിയേറ്റക്കാരായി എത്തിയ 50 ഇന്ത്യക്കാരെ കൂടി യു.എസ്. നാടുകടത്തി. നാടുകടത്തപ്പെട്ട ഏറ്റവും പുതിയ സംഘത്തിൽ ഭൂരിഭാഗവും ഹരിയാന സംസ്ഥാനത്ത് നിന്നുള്ളവരാണ്. ഇന്ത്യയിലേക്ക് തിരിച്ചയച്ചവരിൽ പലർക്കും 25 മണിക്കൂർ വരെ വിമാനയാത്രയിൽ കാലിൽ ചങ്ങല ധരിക്കേണ്ടി വന്നതായി പരാതിയുണ്ട്.

25 മുതൽ 40 വയസ്സ് വരെ പ്രായമുള്ളവരാണ് നാടുകടത്തപ്പെട്ടവരിൽ കൂടുതലും. ഇവർ ശനിയാഴ്ച രാത്രി ഡൽഹിയിൽ വിമാനമിറങ്ങി. പലരും 35 ലക്ഷം മുതൽ 57 ലക്ഷം രൂപ വരെ ഏജൻ്റുമാർക്ക് നൽകി കബളിക്കപ്പെട്ടവരാണ്.

ഹരിയാനയിലെ കർണാൽ, അംബാല, കുരുക്ഷേത്ര, യമുനാനഗർ, പാനിപ്പത്ത്, കൈത്തൽ, ജിന്ദ് എന്നീ ജില്ലകളിൽ നിന്നുള്ളവരാണ് ഈ സംഘത്തിലുള്ളത്. ഹരിയാനയിൽ എത്തിച്ച ഇവരെ നിയമനടപടികൾ പൂർത്തിയാക്കിയ ശേഷം വീടുകളിലേക്ക് അയച്ചതായി അധികൃതർ അറിയിച്ചു.

ഈ വർഷം ആദ്യം, യുഎസ് അധികൃതർ പഞ്ചാബ്, ഹരിയാന, ഗുജറാത്ത് എന്നിവിടങ്ങളിൽ നിന്നുള്ള നിരവധി യുവാക്കളെ ഇന്ത്യയിലേക്ക് നാടുകടത്തിയിരുന്നു. ജനുവരിയിൽ ഡൊണാൾഡ് ട്രംപ് യുഎസ് പ്രസിഡൻ്റായി അധികാരമേറ്റ ശേഷം, രാജ്യത്തെ നിയമ നിർവ്വഹണ ഏജൻസികൾ അനധികൃത കുടിയേറ്റക്കാർക്കെതിരെ കടുത്ത നടപടികൾ ആരംഭിച്ചിരുന്നു.